شعور نیوز( انٹرنیشنل ڈیسک):امریکی مڈ ٹرم الیکشن کے نتائج کے بعد بھی امریکہ ایران جنگی کشیدگی میں کوئی کمی نہیں آئی ہے۔ امریکی صدر ڈونلڈ ٹرمپ نے ایران کے خلاف فوجی کارروائیاں دوبارہ شروع کرنے کے امکان پر اپنی قومی سلامتی ٹیم کے ساتھ اہم مشاورت کی ہے۔جواب میں ایران نے امریکا کو خبردار کیا ہے کہ اگر اس پر دوبارہ حملہ کیا گیا تو ایرانی فوج دنیا بھر میں امریکی اثاثوں کو نشانہ بنا سکتی ہے۔تہران نے واضح کیا ہے کہ اس کارروائی کے لیے کسی جغرافیائی حد کی پابندی نہیں ہوگی۔

خبر رساں ادارے الجزیرہ کے مطابق ایرانی فوج کے ترجمان محمد اکرمینیا نے کہا ہے کہ امریکا کی جانب سے دوبارہ حملے کی صورت میں ایران نام نہاد ’امریکی دشمن‘ کے تمام اثاثوں کو نشانہ بنائے گا، چاہے وہ دنیا کے کسی بھی حصے میں موجود ہوں۔

ایرانی فوج کے ترجمان کا یہ بیان ایسے وقت میں سامنے آیا ہے جب ایران اور امریکا کے درمیان کشیدگی برقرار ہے اور دونوں ممالک کے درمیان ممکنہ فوجی تصادم کے خدشات پر عالمی سطح پر تشویش پائی جاتی ہے۔ایران کے اس بیان سے ظاہر ہوتا ہے کہ تہران کسی نئے حملے کی صورت میں اپنے ردعمل کو صرف خطے تک محدود رکھنے کا عندیہ نہیں دے رہا۔ تاہم ترجمان نے اس بیان میں کسی مخصوص امریکی ہدف یا ممکنہ کارروائی کی تفصیلات نہیں بتائیں۔

امریکی حکام نے اس پیش رفت کی تصدیق کرتے ہوئے بتایا ہے کہ وائٹ ہاؤس میں بدھ اور جمعرات کو اعلیٰ سطح کے اجلاس ہوئے۔

امریکی نشریاتی ادارے فاکس نیوز کے مطابق ان اجلاسوں میں ایران کے خلاف ممکنہ فوجی کارروائیوں اور جنگ دوبارہ شروع کرنے سے متعلق امور پر غور کیا گیا۔ تاہم یہ واضح نہیں کیا گیا کہ مشاورت کے دوران کیا فیصلے کیے گئے یا کسی نئے آپریشن کی منظوری دی گئی ہے۔

فاکس نیوز نے اپنی رپورٹ میں 9 نومبر کو مشرقِ وسطیٰ میں نئے چاند کا حوالہ بھی دیا ہے۔ اس رات چاندنی نہ ہونے یا انتہائی کم ہونے کے باعث اندھیرا زیادہ ہوگا۔ رپورٹ کے مطابق ایسی ماحولیاتی صورتِ حال بعض فوجی کارروائیوں کے لیے فائدہ مند سمجھی جاتی ہے۔
ایرانی حکومت کے ابتدائی جائزوں کے مطابق، امریکی اور اسرائیلی حملوں کے نتیجے میں ایران کے انفراسٹرکچر، توانائی کی تنصیبات، دفاعی اثاثوں اور شہری املاک کو پہنچنے والے نقصانات کا تخمینہ تقریباً 270 ارب ڈالر لگایا گیا ہے۔
ریٹنگ ایجنسی 'موڈیز' اور دیگر مالیاتی رپورٹس کے مطابق، اس جنگ کی وجہ سے امریکی صارفین کو مجموعی طور پر 265 ارب ڈالر سے زائد کا نقصان اٹھانا پڑا ہے۔ بڑھتی ہوئی مہنگائی اور معاشی دباؤ کے باعث ہر امریکی خاندان پر اوسطاً 2 ہزار 147 ڈالر کا اضافی مالی بوجھ پڑا۔پینٹاگون اور کانگریشنل بجٹ آفس (CBO) کے ابتدائی اعداد و شمار کے مطابق، صرف فوجی کارروائیوں کے براہ راست اخراجات 38 سے 42 ارب ڈالر کے درمیان رہے ہیں، جس میں تباہ ہونے والے طیاروں (جیسے 45 ریپر ڈرونز سمیت کل 81 طیارے) اور مشرقِ وسطیٰ میں فوجی اڈوں کو پہنچنے والے نقصانات شامل نہیں ہیں۔ امریکی معیشت کو یومیہ بنیادوں پر تقریباً 89 کروڑ 10 لاکھ ڈالر کا نقصان اٹھانا پڑ رہا ہے۔