برطانیہ میں مسلم اقلیت غیر محفوظ، مسجد کو آگ لگا دی گئی

شعور نیوز( انٹرنیشنل ڈیسک): لندن کے علاقے سسیکس میں پیس ہیون کی ایک مسجد میں ہفتہ کی رات 10 بجے سے کچھ دیر پہلے مسجد کی عمارت پر آگ لگانے کی کوشش کی گئی ۔مسجد کے رضاکار نے عالمی میڈیا کو بتایا کہ دو افراد نے ہفتے کی رات مسجد کا دروازہ زبردستی کھولنے کی کوشش کی اور سیڑھیوں پر پٹرول ڈال کر اسے آگ لگا دی۔مسجد کے نمائندے کے مطابق، مسجد کے چیئرمین اور ایک ساتھی نمازی، جن کی عمریں 60 کی دہائی میں تھیں، اندر چائے پی رہے تھے ۔جب انہوں نے باہر سے دھماکے کی آواز سنی اور آگ دیکھی تو محفوظ رستے سے باہر نکل گئے ۔مسجد رضاکار کے مطابق یہ لوگ زیادہ نقصان پہنچانے کے ارادے کے ساتھ سامان لیکر آئے تھے۔ مگر آگ لگتے ہی پڑوسی نکل آئے اور وہ لوگ فرار ہوگئے۔

پولیس نے اس واقعے کو دہشت گردی کے بجائے Hate crime قرار دے دیا ہے۔حملے سے مسجد کے دروازے اور باہر کھڑی گاڑی کو نقصان پہنچا۔ واقعے میں کوئی زخمی نہیں ہوا، سسیکس پولیس نے تصدیق کی۔آن لائن گردش کرنے والی تصاویر میں عمارت کے دروازے پر ایک جلی ہوئی کار دکھائی دے رہی ہے۔

مقامی پولیس کا کہنا ہے کہ ہماری تلاش و تفتیش جاری ہے۔ علاقے میں سی سی ٹی وی، اور موبائل سے ٹریس کر رہے ہیں۔پورے مشرقی سسیکس کے علاقے اور دیگر عبادت گاہوں کے آس پاس پولیس کا گشت بڑھا دیا گیا ہے۔

برطانوی موسم گرما میں رپورٹ ہونے والا یہ پرتشدد واقعہ پہلا نہیں ہے ۔ برطانیہ میں صرف 6 فیصد مسلمان اقلیت میں رہتے ہیں اور 2سال میں ایسے درجنوںواقعات مسلمانوں کے خلاف رپورٹ ہو چکے ہیں ۔ مساوات و برابری کے نام پر مسلم اقلیت پر ایسے حملے معمول بنتے جا رہے ہیں ۔پولیس نے بھی اس کی تصدیق کی ہے کہ اسلامو فوبک اور سام دشمنی کے واقعات زیادہ ہو رہے ہیں۔ یہ واقعہ مانچسٹر شہر میں ایک یہودی عبادت گاہ کے قریب ایک ٹریفک حادثہ کے چند دن بعد سامنے آیا ہے۔پولیس نے مانچسٹر واقعے کو دہشت گردی قرار دیا جبکہ پولیس نے ماورائے عدالت 2 برطانوی شہری قتل کیے ۔