شعورنیوز( انٹرنیشنل ڈیسک):اسپین کے صوبے ٹولیڈو میں 28 اکتوبر کی صبح 9 بجے دو ہائی اسپیڈ ٹرین ٹکرا گئیں۔ اس حادثے نے ملک کے ریلوے انفراسٹرکچر اور سیفٹی سسٹمز پر دوباہ سنگین سوالات کھڑے کر دیے ہیں۔ سال 2026 کے ابتدائی 10 مہینوں میں یہ اسپین کا تیسرا بڑا ریلوے حادثہ ہے، جو یورپی یونین کے جدید ترین ٹرین نیٹ ورکس میں شمار ہونے والے نظام میں سنگین خامیوں کی نشاندہی کرتا ہے۔

مرکزی اسپین کے علاقے ٹولیڈو میں ایک تیز رفتار مسافر ٹرین نے آگے جانے والی دوسری ٹرین کو پیچھے سے ہٹ کر دیا۔ ابتدائی رپورٹس کے مطابق اس تصادم کے نتیجے میں ٹرین کی دو بوگیاں پٹری سے اتر گئیں۔عالمی میڈیا پر کم از کم 39 افراد کی ہلاکتوں اور درجنوں زخمی ہونے کی اطلاعات ہیں۔ امدادی ٹیمیں جائے وقوعہ پر ملبہ ہٹانے اور پھنسے ہوئے مسافروں کو نکالنے میں مصروف ہیں، اور ہلاکتوں میں اضافے کا خدشہ ظاہر کیا جا رہا ہے۔

اس سے قبل اسپین میں ٹرین کے دو بڑے حادثات جو جنوری میں ہوئے وہ یہ تھے:

جنوری 2026 (قرطبہ): آدامُز کے قریب دو ہائی اسپیڈ ٹرینوں کے تصادم میں 46 افراد ہلاک ہوئے تھے۔

جنوری 2026 (جیلیڈا): بارسلونا کے قریب حفاظتی دیوار گرنے سے ٹرین پٹری سے اتری اور ایک ہلاکت ہوئی۔

صرف 10 ماہ کے عرصے میں تین جان لیوا حادثات کا رونما ہونا محض ’اتفاق‘ یا روایتی انسانی غلطی نہیں، بلکہ اسپین کے ریلوے مینیجمنٹ نیٹ ورک کی سنگین نظاماتی ناکامی معلوم ہوتا ہے۔

ٹولیڈو میں ایک ہی ٹریک پر دو ٹرینوں کا اس طرح موجود ہونا اور پیچھے سے ٹکر لگنا یہ ثابت کرتا ہے کہ جدید ترین سگنلنگ اور تصادم سے بچانے والے خودکار نظام یا تو فعال نہیں تھے یا انہیں نظر انداز کیا گیا۔بارسلونا اور قرطبہ کے حادثات کے بعد بھی ٹریکس اور حفاظتی پروٹوکولز کی اپ گریڈیشن میں سستی برتی گئی، جس کی قیمت مسافروں کو اپنی جان دے کر چکانی پڑ رہی ہے۔

اسپین کی حکومت اور ریلوے اتھارٹیز ہائی اسپیڈ ٹرینوں کی تعداد بڑھانے پر تو توجہ دے رہی ہیں، لیکن حفاظتی آڈٹ اور ہنگامی ردعمل کے نظام کو جدید خطوط پر استوار کرنے میں مسلسل ناکام رہی ہیں۔