شعور نیوز( انٹرنیشنل ڈیسک):بھارت کے وزیرِاعظم نریندر مودی کی 33 سال قبل وفات پانے والے روحانی پیشوا سوامی چنمیانند کے مصنوعی ذہانت سے تیار کردہ ہولوگرام سے گفتگو کو سوشل میڈیا پر نیا تماشہ قرار دیا جا رہا ہے۔یاد رہے کہ سوامی چنمیانند 3 اگست 1993 کو امریکی شہر سان ڈیاگو میں مر گئے تھے۔ مودی کا دعویٰ ہے کہ ان کی ملاقات سوامی سے اسی سال ہوئی تھی تاہم اس ملاقات کے مقام اور تاریخ سے متعلق مختلف بیانات سامنے آئے ہیں۔

نئی دہلی میں چنمیا امرت مہوتسو عالمی کانفرنس کے افتتاح کے موقع پر مودی نے فوت شدہ سوامی کے ہولوگرام سے اپنے مستقبل کے منصوبوں کے لیے آشیرباد مانگا۔ جواب میں ڈیجیٹل کردار نے کہا کہ بھارت مودی کے ساتھ ہے۔اس اے آئی اوتار نے نہ صرف سوامی کے چہرے کے تاثرات اور آواز کو ہو بہو نقل کیا بلکہ 1993 میں وڈودرا کے مقام پر مودی کے ساتھ ہونے والی ایک پرانی ملاقات کا ذکر کرتے ہوئے ان سے مزاحیہ اور ستائشی انداز میں بات چیت کی اور انہیں کھانا کھانے کی ہدایت بھی کی۔

سوشل میڈیا صارفین نے اس عمل کو مضحکہ خیز اور اخلاقی اصولوں کے منافی قرار دیتے ہوئے کہا کہ وفات پا جانے والی مذہبی شخصیات کو مصنوعی ذہانت کے ذریعے سیاسی تشہیر کے لیے استعمال کرنا افسوسناک ہے۔جب ڈیجیٹل کردار مرحوم کی آواز میں گفتگو کرے تو عام ناظر کے ذہن میں اصل شخصیت کی موجودگی کا تاثر پیدا ہو سکتا ہے۔

بھارتی ویب سائٹ دی وائر کے مدیر سدھارتھ وردراجن نے اس مکالمے کو فرضی قرار دیتے ہوئے تنقید کی کہ میڈیا اسے ایسے پیش کر رہا ہے جیسے مودی نے واقعی وفات پا چکے سوامی سے بات کی ہو۔کانگریس سے وابستہ رہنما سرینواس بی وی نے بھی سوال اٹھایا کہ مصنوعی ذہانت کو سائنسی اور سماجی ترقی کے بجائے مودی کی تعریف کے لیے استعمال کیا جا رہا ہے۔

مصنوعی ذہانت سے تیار کردہ ہولوگرام کسی مرحوم سے رابطے کی ایک ڈیجیٹل کوشش ہوتی ہے۔ اسے یہ دستیاب تصاویر، آوازوں اور ریکارڈنگز کی مدد سے اس شخص کی ڈیجیٹل نقل بناتا ہے اور سافٹ ویئر کے ذریعے جوابات تیار کرتا ہے۔

اس واقعے کا سب سے تشویش ناک پہلو یہ ہے کہ مصنوعی ذہانت اب صرف تصاویر بنانے یا معلومات فراہم کرنے تک محدود نہیں رہی۔ اس کے ذریعے کسی حقیقی انسان کے چہرے، آواز، اندازِ گفتگو اور شخصیت سے مشابہ ڈیجیٹل کردار تیار کرکے ایسے جملے بھی کہلوائے جا سکتے ہیں جو اس شخص نے اپنی زندگی میں کبھی نہ کہے ہوں۔

گوگل ڈیپ مائنڈ کے محققین نے 2025 میں ایسے مصنوعی کرداروں کے سماجی اور اخلاقی اثرات پر تحقیق شائع کی جو کسی شخص کی وفات کے بعد اس کی ڈیجیٹل نقل کے طور پر لوگوں سے گفتگو کر سکتے ہیں۔ اس تحقیق میں ممکنہ فوائد کے ساتھ نفسیاتی اور سماجی خطرات بھی زیرِ بحث آئے۔