شعور نیوز ( ویب ڈیسک):کراچی کے علاقے ڈیفنس پولیس نے پنجاب کے شہر لودھراں سے لاپتہ ہونے والی 14 اور 15 سالہ دو لڑکیوں کو بازیاب کرا لیا۔تفصیلات کے مطابق فلموں ڈراموں میں کام کرنے کے خطرناک اثرات نے لودھراں کی رہائشی لڑکیوں کو چور بنا دیا۔بے جان اسکرین کے ذریعہ پھیلنے والا خطرناک زہر جس طرح سے ، جس رفتار سےکام کر رہا ہے وہ کسی کے قابو میں نہیں آرہی ۔نہم جماعت کی 2 طالبات نے اس عمر میں ایسا قدم اٹھایا ہے کہ اپنے والدین گھر بار سب چھوڑ کر وہ کراچی جیسے شہر پہنچ گئیں۔ دونوں طالبات نے مبینہ طور پر گھروں سے نقدی چرائی اور کراچی پہنچی، جبکہ والدین نے لودھراں میں دونوں کے اغوا کا مقدمہ درج کروا لیا تھا۔

پولیس حکام کے مطابق ڈیفنس فیز 7 ایکسٹینشن میں خفیہ اطلاع پر کارروائی کرتے ہوئے دونوں لڑکیوں کو لاوارث حالت میں گھومتے ہوئے تحویل میں لیا گیا۔ انہیں بحفاظت حفاظتی تحویل میں رکھا گیا ہے۔پولیس کے مطابق دونوں لڑکیاں لودھراں سے لاپتہ ہوئی تھیں اور اس حوالے سے متعلقہ تھانے میں مقدمہ بھی درج ہے۔وزیراعلیٰ پنجاب مریم نواز نے بھی لڑکیوں کے لاپتہ ہونے کے واقعے کا نوٹس لیا تھا۔ ڈی پی او لودھراں ڈیفنس پولیس سے رابطے میں ہیں، جبکہ دونوں لڑکیوں کو جلد پنجاب پولیس کے حوالے کیا جائے گا۔پولیس کا کہنا ہے کہ لڑکیوں کی بازیابی کے بعد مزید قانونی کارروائی جاری ہے۔

دونوں طالبات کی بازیابی کے لئے وزیر اعلیٰ پنجاب نے بھی نوٹس لیا تھا۔ تفصیلات کے مطابق ڈیفنس کے علاقے فیز سیون ایکسٹینشن سے بازیاب کروائی جانے والی 2 نو عمر لڑکیاں 15 سالہ فزا بنت پرویز اور 16 سالہ ماریہ بنت عبد المالک نہم جماعت کی طالبات ہیں جو کہ ڈراموں اور فلموں سے متاثر ہو کر گھر سے کراچی آئی تھیں۔

اس حوالے سے ایس ایچ او زبیر نواز نے بتایا کہ 7 نومبر کی دوپہر دوران گشت اطلاع ملی تھی کہ دو لڑکیاں مشکوک انداز میں ڈیفنس فیز سیون ایکسٹینشن میں گھوم رہی ہیں جس پر پولیس نے پہنچ کر دونوں لڑکیوں سے معلومات حاصل کیں تو انہوں نے بتایا کہ وہ لودھراں سے کراچی آئی ہیں جس پر دونوں کو حفاظتی تحویل میں لیا۔ دونوں نے تفتیش کے دوران بتایا کہ وہ دونوں فلموں اور ڈراموں کا شوق رکھتی ہیں اور دونوں فلموں اور ڈراموں سے متاثر ہو کر کراچی آئی تھیں دونوں نے گھروں سے پیسے چوری کئے تھے اور بذریعہ بس 7 نومبر کو کراچی پہنچی تھیں۔ کراچی پہنچنے کے بعد دونوں کے پاس 5 ہزار روپے تھے جو کہ خرچ ہو گئے۔ جس وقت پولیس نے انہیں حفاظتی تحویل میں لیا تھا اس وقت دونوں پیسے ختم ہونے پر ڈیفنس میں واقع نجی اسٹور میں ملازمت کے لئے انٹرویو دینے گئی تھیں تاہم کم عمر ہونے کے سبب اسٹور انتظامیہ نے انہیں نوکری پر نہیں رکھا تھا۔ڈیفنس پولیس نے لودھراں پولیس سے رابطہ کیا تو لودھراں پولیس نے بتایا کہ دونوں لڑکیوں کے اغوا کا مقدمہ تھانہ گیلے وال ضلع لودھراں میں لودھراں کے رہائشی عبد المالک کی مدعیت میں درج ہوا ہے۔ لودھراں پولیس کی ٹیم نے دونوں لڑکیوں کو ضابطے کی کارروائی کے بعد لودھراں کے لئے روانہ کر دیا ہے۔ واضح رہے کہ دونوں لڑکیوں کے اغوا سے متعلق وزیر اعلیٰ پنجاب مریم نواز نے بھی نوٹس لیا تھا۔