شعور نیوز( ویب ڈیسک): ہارورڈ میڈیکل اسکول اور برطانوی ماہرینِ چشم کی حالیہ عالمی تحقیقات نے یہ واضح کر دیا ہے کہ روزانہ گھنٹوں اسکرین سے چپکے رہنا نہ صرف بینائی کو کمزور کرتا ہے بلکہ دماغی صلاحیتوں اور اعصابی نظام کو بھی شدید نقصان پہنچاتا ہے۔ستم یہ ہے کہ دنیا بھر کی سائنسی تحقیقات بتا رہی ہیں کہ ڈیجیٹل اسکرینز کا بے دریغ استعمال انسانی دماغ اور آنکھوں کے لیے ایک زہر کی حیثیت رکھتا ہے۔ اس کے باوجود استعمال میں کوئی کمی نہیں آرہی اور مریض مستقل بڑھ رہے ہیں ۔جب تمام سائنسی حقائق واضح اور عیاں ہیں، تو بھی اس حقیقت کو عمل میں نہیں ڈھالا جا رہا ۔ اس کی بنیادی وجہ وہ ڈیجیٹل نشہ اور ڈوپامائن کا لامتناہی چکر ہے جس میں سوشل میڈیا اور ڈیجیٹل ایپلی کیشن نے ہمارے دماغ کو جکڑ رکھا ہے۔ انسانی جبلت فوری تسکین چاہتی ہے، اور اسکرین ہمیں پلک جھپکتے میں وہ مہیا کر دیتی ہے۔ ہم جانتے ہیں کہ یہ زہر ہے، لیکن سہولت، مجبوری اور عادت کا یہ ایسا طلسم ہے جس سے نکلنا آج کے انسان کے لیے سب سے بڑا امتحان بن چکا ہے۔

پاکستان میں بڑھتا ہوا بحران اور طبی ماہرین کی وارننگ

پاکستان میں بھی موبائل فون، لیپ ٹاپ اور کمپیوٹر کے بڑھتے ہوئے استعمال کے باعث اسکرین ٹائم خطرناک حد تک بڑھ چکا ہے۔ جس کے براہِ راست اثرات اب اسپتالوں کے او پی ڈیز میں نظر آنے لگے ہیں۔شہد محترمہ بے نظیر بھٹو انسٹی ٹیوٹ آف ٹراما کے ماہرِ امراض چشم پروفیسر ڈاکٹر مشہود الظفر فاروق نے اس حوالے سے بتایا کہ اسکرین کا زیادہ استعمال آنکھوں کو بری طرح متاثر کرتا ہے، جسے طبی زبان میں ڈیجیٹل آئی اسٹرین (Digital Eye Strain) یا کمپیوٹر ویژن سنڈروم (Computer Vision Syndrome) کہا جاتا ہے۔

عام حالات میں انسان کی پلکیں ایک منٹ میں 15 سے 20 مرتبہ جھپکتی ہیں، لیکن جب ہم کسی اسکرین پر نظریں گڑھا کر کام کرتے ہیں تو یہ رفتار غیر ارادی طور پر سست پڑ جاتی ہے۔ اس سے آنکھوں کی قدرتی نمی ختم ہو جاتی ہے اور درج ذیل علامات جنم لیتی ہیں:

آنکھوں میں شدید خشکی، جلن اور خارش
آنکھوں کا سرخ ہونا اور تھکاوٹ یا بوجھ محسوس ہونا
اسکرین سے نظر ہٹانے کے بعد دھندلا دکھائی دینا
سر اور پیشانی میں مسلسل درد
قریب سے دور یا دور سے قریب دیکھنے میں فوکس کا متاثر ہونا

آغا خان یونیورسٹی اسپتال کی سینئر انسٹرکٹر اور ماہرِ اعصاب و امراض چشم ڈاکٹر سحریش مومن کا کہنا ہے کہ طالب علموں، دفاتر میں کام کرنے والے پروفیشنلز اور طویل وقت تک ڈیجیٹل آلات استعمال کرنے والوں میں یہ شکایات تیزی سے بڑھ رہی ہیں۔ انہوں نے واضح کیا کہ اگرچہ اسکرین کا استعمال براہِ راست موتیا یا کالے موتیا کی وجہ نہیں بنتا، لیکن یہ ڈیجیٹل آئی اسٹرین اور شدید اعصابی تھکاوٹ کی سب سے بڑی وجہ ہے۔

بچاؤ اور احتیاطی تدابیر

چونکہ موجودہ دور میں اسکرین کا استعمال مکمل طور پر ترک کرنا ممکن نہیں، اس لیے ماہرین نے اس کے نقصانات سے بچنے کے لیے درج ذیل سنہری اصول اپنائے جانے پر زور دیا ہے:

20-20-20 کا اصول: ہر 20 منٹ کے بعد اسکرین سے نظریں ہٹائیں اور 20 سیکنڈ کے لیے تقریباً 20 فٹ دور کسی چیز کو دیکھیں یا آنکھیں بند کر لیں۔
پلکیں جھپکانے کی عادت: کام کے دوران شعوری طور پر پلکیں زیادہ جھپکائیں تاکہ آنکھوں میں نمی برقرار رہے۔
مناسب فاصلہ اور وقفے: لیپ ٹاپ یا کمپیوٹر کو آنکھوں سے مناسب فاصلے پر رکھیں اور ہر ایک گھنٹے بعد چند منٹ کے لیے اپنی جگہ سے اٹھ کر چہل قدمی کریں۔
بچوں کی حفاظت: بچوں کو موبائل فون اور اسکرینز سے حتی الامکان دور رکھیں اور انہیں آؤٹ ڈور جسمانی کھیلوں کی طرف راغب کریں۔
باقاعدہ معائنہ: بڑوں اور بچوں کو سالانہ بنیادوں پر اپنی آنکھوں کا چیک اپ کرانا چاہیے، اور نظر کی کمزوری کی صورت میں درست نمبر کا چشمہ استعمال کرنا چاہیے۔