شعور نیوز( انٹرنیشنل ڈیسک):برطانیہ ،اٹلی ،بلغاریہ اور آئرلینڈ کے سیکڑوں اسکولوں میں بم نصب کرنے کی دھمکیاں ای میل سے موصول ہونے پر تین ملکوں کاسارا تعلیمی نظام مفلوج ہوگیا۔ طلبہ اور والدین میں شدید خوف و ہراس پھیل گیا۔ اٹلی میں تقریباً 300 سے زائد اسکولوں کو ایمرجنسی بنیادوں پر خالی کرایا گیا، پولیس، بم ڈسپوزل اسکواڈ اور سکیورٹی اداروں نے تلاشی کا عمل مکمل کیا، جو بعد میں غلط ثابت ہوا۔کچھ ہی دن قبل برطانیہ کے ہیتھرو ایئرپورٹ پر ایسی ہی غلط اطلاعات آئیں اور اب اسکولوں کو ہدف بنانے کے واقعات بتا رہے ہیں کہ سرمایہ دارانہ ریاست کے اعصاب کو مسلسل چیلنج کر اجا رہا ہے ۔ ریاست کی رٹ، انٹیلی جنس اور سائبر سکیورٹی کے نظام اس نوعیت کے "سائبر ہائبرڈ فتنوں" کو جڑ سے اکھاڑنے میں ناکام نظر آتے ہیں کیونکہ اب وہی کام بغیر بم رکھے صرف اطلاع دینے سے ہو رہا ہے ۔

عالمی میڈیا کے مطابق اسکول سے نکلنے والے بچے بچیاں خوف سے روئے بھی کیونکہ اُنہیں اس غیر معمولی سیکورٹی اور معاملات سمجھ نہیں آ ئے کہ اچانک اس طرح سب کو عمارت سے کیوں نکالا جا رہا ہے۔ معصوم بچوں کے تعلیمی ماحول میں اس طرح کی دہشت پھیلانا ایک خاموش ذہنی قتل ہے۔ جب اس قسم کے دھمکی آمیز میلز (جن کے آخر میں مبینہ طور پر 'اینڈرُو پوپ، لیڈر آف ولایت آف مسوجینستان' جیسے فرضی دستخط ہوتے ہیں)کھلے عام بھیجے جاتے ہیں اور ریاستی ادارے صرف "یہ دھمکیاں جعلی تھیں" کہہ کر پلہ جھاڑ لیتے ہیں، تو یہ نظام کی سست روی اور جدید سائبر کرائم سے نمٹنے کی صلاحیت پر ایک بڑا سوالیہ نشان ہے۔

اٹلی کے اسکولوں کو بھیجی گئی دھمکی آمیز ای میل پر وہی فرضی نام درج تھا جو جمعے کے روز بلغاریہ اور آئرلینڈ کے نیوز رومز کو موصول ہونے والے اسی نوعیت کے پیغامات میں استعمال کیا گیا تھا۔

شمالی آئرلینڈ کے تقریباً 300 اسکول بھی ان دھمکیوں سے متاثر ہوئے، تاہم فوری طور پر یہ واضح نہیں ہو سکا کہ آیا یہ پیغامات ایک ہی شخص یا گروہ کی جانب سے بھیجے گئے تھے۔

یورپ بھر میں حالیہ دنوں کے دوران سپر مارکیٹوں، ایئر ٹریفک کنٹرولرز، بلڈ بینکوں اور نشریاتی اداروں پر ہونے والے سائبر و ہائبرڈ حملوں نے یورپی رہنماؤں میں یہ تشویش پیدا کر دی ہے کہ یہ سب کسی منظم "ہائبرڈ وارفیئر" (مخلوط جنگ) کی کوشش کا حصہ ہو سکتا ہے۔

اسی تناظر میں فرانس نے 10 نومبر کو ایرانی سفیر کو ان سائبر حملوں پر طلب کیا جن کے باعث سپر مارکیٹوں کے فریزر بند (ڈی فراسٹ) ہو گئے تھے، تاہم تہران نے ان حملوں میں کسی بھی قسم کے ملوث ہونے کی تردید کی ہے۔