شعور نیوز( انٹرنیشنل ڈیسک):23 جنوری کی شب روس نے یوکرین کے دو بڑے شہروں کیف (Kyiv) اور خارکیف (Kharkiv) پر چار سالہ جنگ کا سب سے بڑامیزائل اور ڈرون حملہ کردیا۔ اہم بات یہ ہے کہ ان حملوں کے دوران یوکرین، روس اور امریکہ کے درمیان ابوظہبی، متحدہ عرب امارات میں امن مذاکرات جاری تھے۔سی این این کے مطابق 370 ڈرون اور 21 میزائل فائر کیے گئے۔
یوکرین کی وزارتِ خارجہ نے اسے ’دہشت گردی ‘ قرار دیا اور شدید تنقید کی کہ روس نے مذاکرات کے عین بیچ میں شہریوں اور بنیادی شہری ڈھانچے کو نشانہ بنایا۔روس نے ڈرونز اور میزائل حملے میں استعمال کیے، جس سے بجلی، ہیٹنگ اور پانی کی خدمات شدید متاثر ہوئیں اور لاکھوں لوگ سرد موسم میں مشکلات کا شکار ہوئے۔بڑے رہائشی اور طبی مراکز بھی نقصان پہنچا۔یوکرین کا مؤقف یہ ہے کہ روسی حملے امن کوششوں کو نقصان پہنچانے اور مذاکرات کو غیر مؤثر بنانے کی ایک کوشش ہیں۔ اس جنگ سے متعلق اہم نکات یہ ہیں:

روس یوکرین جنگ فروری 2022 میں شروع ہوئی جب روس نے مکمل فوجی انخلا کے بغیر یوکرین میں بڑے پیمانے پر حملہ کیا۔ تب سے یہ جنگ جاری ہے۔
ہزاروں فوجی اور لاکھوں عام شہری جاں بحق یا زخمی ہوچکے، جن کی کوئی تعداد عالمی میڈیا یا کسی میڈیا پر جاری نہیں کی جاتی ؛اس لیے بعض تخمینوں کے مطابق ہلاکتیں لاکھوں تک ہونگی۔
بے گھر ہونے والوں کی تعداد بھی بہت زیادہ ہے۔یوکرین کے شہروں کی بنیادی خدمات، جیسے بجلی، پانی، اور ہسپتال حملوں کی وجہ سے شدید متاثر ہو ئے ہیں۔
یوکرین اور روس دونوں کے انفراسٹرکچر، معیشت، اور انسانی وسائل کو ناقابلِ تلافی نقصان پہنچا ہے۔
عالمی خوراک، توانائی اور لاجسٹکس مارکیٹس پر جنگ کے اثرات محسوس کیے جا رہے ہیں ۔خصوصاً اناج اور توانائی کی قیمتوں میں اتار چڑھاؤ کیونکہ یوکرین گندم کا بڑا پیداواری مرکز ہے۔
روسی قبضہ شدہ علاقوں میں بھی لڑائیاں اور مزاحمت جاری ہے، خاص طور پر ڈونباس اور مشرقی علاقوں میں تنازعہ سخت ہے۔
یہ جنگ صرف دو ممالک کے درمیان نہیں، بلکہ عالمی سطح پر ایک وسیع سیاسی اور اقتصادی معرکہ بھی بن گئی ہے۔
اس دوران امریکہ، یورپی یونین اور نیٹو نے ایک حد تک یوکرین کی حمایت کی ہے جبکہ روس نے چین، ایران، اور دیگر طاقتوں کے ساتھ تعلقات مضبوط کیے ہیں۔
امریکہ اور مغربی طاقتیں روس اور چین دونوں کو سفارتی، فوجی، اور معاشی چیلنج سمجھتی ہیں۔امریکہ چاہتا ہے کہ عالمی طاقت کا توازن اس کے مفادات کے مطابق رہے، خاص طور پر یورپ اور ایشیا میں۔
دنیا پر سرمایہ دارانہ نظام کے غلبے کے بعد مستقل جنگوں کا نا ختم ہونے والا سلسلہ یہی بتاتا ہے کہ سرمایہ دارانہ نظام کو جنگوں کی مستقل اشد ضرورت ہوتی ہے ۔
سرمایہ دارانہ نظام (Capitalism) مسلسل توسیع، منافع، منڈیوں اور وسائل کے حصول پر قائم ایک مکمل تہذیبی انتظام ہے۔
صرف ہتھیار بیچنے کے لیے نہیں بلکہ انسان ختم کرنے کے لیے ۔ انفرا اسٹرکچر ختم کرنے، سرمایہ کے مجموعی ارتکاز کے لیے بھی اُس کو جنگوں کی ضرورت ہوتی ہے ۔
جنگ عظیم اول، دوم، ویتنام، روس افغانستان ، عراق، ایران، فلسطین، بوسنیا ، شام، یوکرین سمیت ساری دنیا کے خطوں میں جاری جنگوں کو دیکھ لیں تو یہی نتیجہ نظر آئیگا۔
اس وقت یوکرین روس جنگ کو عالمی جیوپولیٹیکل محاذ جنگ میں بدلا جا رہا ہے ، جس کا اثر آنے والے برسوں تک برقرار رہے گا۔