شعورنیوز(ویب ڈیسک):پاکستان میں سود کے مکمل خاتمے کے لیے مقرر آئینی مدت ختم ہونے میں تقریباً ایک سال باقی رہ گیا ہے، لیکن دوسری جانب اسٹیٹ بینک آف پاکستان نے ایک مرتبہ پھر سود ہی کو معاشی پالیسی کا بنیادی ہتھیار بناتے ہوئے پالیسی ریٹ میں 50 بیسس پوائنٹس اضافہ کرکے اسے 11.5 فیصد سے بڑھا کر 12 فیصد کردیا ہے۔

گورنر اسٹیٹ بینک سمیت جو لوگ اس طرح کے فیصلے کرتے ہیں ان کو اس بات سے کوئی مسئلہ نہیں ہوتا کہ پیٹرول 400 روپے ہوجائے یا آٹا 200 روپے کلو ہوجائے۔ وہ محض سرمایہ دارانہ مفادات کو ہی ہدف رکھنے کے ہی ماہرین ہوتے ہیں۔

اسٹیٹ بینک کے مطابق نئی شرح کا اطلاق 27 اکتوبر 2026 سے ہوگا۔ مرکزی بینک کا مؤقف ہے کہ عالمی سطح پر تیل اور توانائی کی بلند قیمتوں، مہنگائی کے ممکنہ ثانوی اثرات اور بیرونی کھاتے پر دباؤ کے باعث شرح سود بڑھانا ضروری ہوگیا تھا۔ مانیٹری پالیسی کمیٹی کے دس میں سے نو ارکان نے اضافے کی حمایت کی۔لیکن اس فیصلے کا ایک دوسرا اور بنیادی پہلو بھی ہے جس پر محض مہنگائی کے اعداد و شمار سے بحث مکمل نہیں ہوتی۔

اسٹیٹ بینک آف پاکستان کی مانیٹری پالیسی کمیٹی کا اجلاس ہوا، جس میں اعلیٰ تعلیم یافتہ ماہرین نے ملکی معاشی صورت حال، مہنگائی کے رجحانات، عالمی منڈی میں توانائی کی قیمتوں اور دیگر اہم معاشی اشاریوں کا جائزہ لینے کے بعد پالیسی ریٹ طے کیا۔گورنر اسٹیٹ بینک جمیل احمد نے نئی مانیٹری پالیسی کا اعلان کرتے ہوئے بتایا کہ فیصلے میں کمیٹی کے 10 ارکان نے حصہ لیا، جن میں سے 9 نے شرح سود بڑھانے کے حق میں ووٹ دیا جب کہ ایک رکن نے اس کی مخالفت کی۔انہوں نے کہا کہ گزشتہ مانیٹری پالیسی اجلاس کے بعد عالمی اور ملکی معاشی صورت حال میں نمایاں تبدیلیاں آئی ہیں۔ مشرق وسطیٰ میں جاری کشیدگی، عالمی منڈی میں خام تیل کی قیمتوں کا مسلسل 100 ڈالر فی بیرل سے اوپر رہنا اور توانائی کی قیمتوں میں اضافے کے باعث مہنگائی پر دباؤ بڑھا ہے۔ اس کے علاوہ ملک میں گندم کی قیمتوں سمیت دیگر عوامل کو بھی پالیسی ریٹ کے فیصلے میں مدنظر رکھا گیا۔

پاکستانی معیشت ایسے وقت میں مزید بلند شرح سود کی طرف جارہی ہے جب ریاست آئینی طور پر ربا کے خاتمے کی ایک واضح مدت کی پابند ہے۔ وفاقی شرعی عدالت نے 28 اپریل 2022 کو اپنے تاریخی فیصلے میں حکومت کو ہدایت کی تھی کہ 31 دسمبر 2027 تک ملکی معیشت کو سود سے پاک کیا جائے۔ اس فیصلے کے خلاف اسٹیٹ بینک اور بعض کمرشل بینک سپریم کورٹ گئے تھے، تاہم نومبر 2022 میں یہ اپیلیں واپس لے لی گئیں۔اگر دسمبر 2027 تک سودی نظام ختم ہونا ہے تو اکتوبر 2026 میں ملکی مانیٹری پالیسی کا مرکز اب بھی Interest Rate Corridor، Policy Rate، Repo Rate اور سودی قرض کی قیمت کیوں ہے؟

اسٹیٹ بینک کے اپنے موجودہ مالیاتی فریم ورک میں پالیسی ریٹ بنیادی آلہ ہے، جس کے ذریعے قرض کی قیمت، بینکاری نظام میں لیکویڈیٹی اور بالآخر معاشی سرگرمی کو متاثر کیا جاتا ہے۔ یعنی پورے مانیٹری نظام کا مرکزی lever آج بھی شرح سود ہے۔

اسی لیے 12 فیصد پالیسی ریٹ کو صرف ’’مہنگائی کے خلاف قدم‘‘ کہہ دینا کافی نہیں۔ سرمایہ دارانہ مانیٹری نظام میں شرح سود سرمایہ اور قرض کی قیمت متعین کرتی ہے۔ جب مہنگائی بڑھے تو مرکزی بینک طلب کو دبانے، قرض مہنگا کرنے اور سرمایہ کاری و کھپت کو محدود کرنے کے لیے شرح سود بڑھاتا ہے۔

نتیجہ یہ نکلتا ہے کہ معاشی بحران کا بوجھ صرف بڑے مالیاتی اداروں پر نہیں پڑتا بلکہ کاروباری طبقہ، صنعت، گھر بنانے والا شخص، قرض لینے والا ادارہ اور بالآخر عام صارف بھی مہنگے سرمائے کی قیمت ادا کرتا ہے۔

یوں سوال پیدا ہوتا ہے کہ مہنگائی پیدا کرنے والے بنیادی عوامل اگر عالمی تیل کی قیمت، درآمدی انحصار، رسد کی رکاوٹیں، توانائی کا بحران یا خوراک کی قیمتیں ہیں تو ان کا علاج کاروباری سرمائے اور قرض کو مزید مہنگا کرنے سے کس حد تک ممکن ہے؟

خود اسٹیٹ بینک تسلیم کرتا ہے کہ مانیٹری پالیسی کے مکمل اثرات معیشت تک پہنچنے میں چھ سے آٹھ سہ ماہیاں، یعنی تقریباً ڈیڑھ سے دو سال، لگ سکتے ہیں۔
گورنر اسٹیٹ بینک نے کہا کہ گزشتہ جائزوں کے دوران توقع تھی کہ مہنگائی کی شرح آئندہ مالی سال کی پہلی سہ ماہی تک 7 فیصد کے قریب آجائے گی تاہم عالمی منڈی میں تیل کی بلند قیمتوں اور ان کے بالواسطہ اثرات کے باعث مہنگائی کو ہدف کی سطح پر لانے میں پہلے اندازے سے زیادہ وقت لگ سکتا ہے۔
ان کے مطابق درآمدات میں اضافے کے باعث ترسیلات زر اور برآمدات میں بہتری سے حاصل ہونے والے فوائد کا کچھ حصہ زائل ہوسکتا ہے، جس سے بیرونی کھاتے پر دباؤ برقرار رہنے کا خدشہ ہے۔

جمیل احمد نے زرمبادلہ کے ذخائر کی صورت حال پر گفتگو کرتے ہوئے کہا کہ پاکستان کے بیرونی کھاتے میں 2022 کے بعد نمایاں بہتری آئی ہے۔انہوں نے بتایا کہ 2023 میں پاکستان کے زرمبادلہ کے ذخائر کم ہوکر 2.8 ارب ڈالر رہ گئے تھے، جو تقریباً دو ہفتوں کی درآمدات کے لیے کافی تھے تاہم اب زرمبادلہ کے ذخائر بڑھ کر 21.5 ارب ڈالر ہوگئے ہیں۔

شرح سود کو 12 فیصد کرنا وقتی طور پر مرکزی بینک کے موجودہ inflation-targeting framework کے مطابق قابلِ فہم ہوسکتا ہے، لیکن ایک ایسے ملک میں جہاں ربا کے مکمل خاتمے کی تاریخ خود آئین میں درج ہوچکی ہے، ہر نئی شرح سود کا اعلان ایک بڑے سوال کو مزید نمایاں کرتا ہے۔

پاکستان کو بالآخر فیصلہ کرنا ہوگا کہ اس کا معاشی مستقبل سودی سرمایہ دارانہ مالیاتی نظام کے اندر مسلسل rate adjustment پر قائم ہوگا یا وہ واقعی ایسے مالیاتی نظام کی طرف بڑھے گا جس میں سرمایہ حقیقی معاشی سرگرمی، ملکیت، تجارت اور risk-sharing سے منسلک ہو۔

2027 کی ڈیڈ لائن قریب ہے۔ اب سوال سود کی شرح 11.5 فیصد ہے یا 12 فیصد، یہ نہیں۔ اصل سوال یہ ہے کہ 2028 میں سود کی شرح صفر ہوگی یا صرف سود کا نام بدل جائے گا؟