شعورنیوز(ویب ڈیسک):خیبر پختونخوا کے ضلع مہمند میں ریسکیو حکام کے مطابق 3 نومبر 2026کو پولیو مہم کے دوران فائرنگ کے نتیجے میں دو پولیس اہلکار جان بحق ہوگئےجبکہ ایک اہلکار زخمی ہوگیا۔اسی طرح ایک دوسرے واقعے میں ضلع ٹانک میں پولیس کے مطابق پولیو مہم میں مصروف چار پولیو ورکرز کو نامعلوم افراد نے اغوا کر لیا ہے۔

پاکستان میں 1994 سے پولیو کے خاتمے کی مہم شروع ہوئی ، اعداد و شمار کے مطابق 99فیصد پولیو کو پاکستان سے ختم کیا جا چکا ہے لیکن اب بھی اگر 25 کروڑ آبادی میں کوئی ایک کیس بھی آجاتا ہے تو پوراملک ہلا دیا جاتا ہے۔2026 کے 10 ماہ میں پورے صوبہ خیبرپختونخوا میں صرف 6 کیسز سامنے آئے جبکہ عرب نیوز کے مطابق پورے پاکستان میں 8 پولیو کیسز ملے ہیں۔

ایسے میں حکومت کی غیر معمولی پھرتیاں مزید شکوک میں ڈالتی ہیں، کیونکہ بجلی، پانی ، بے روزگاری،منشیات فروشی، کرپشن، بے حیائی، مہنگائی، سود ، فالج، شوگر ، ہارٹ اٹیک جیسے سنگین معاملات پر حکومت ٹس سے مس نہیں ہوتی لیکن پورے ملک میں اگر 8بچوں میں کوئی بیمار ی آجائے تو ا سکے لیے مہمات چلنا شروع ہوجاتی ہیں۔

پہلا واقعہ مہمند کی تحصیل پنڈیالی کے علاقے تمازئی میں اس وقت پیش آیا جب انسداد پولیو مہم کے سلسلے میں ٹیم وہاں موجود تھی۔کراچی کے علاوہ پاکستان کے دیگر حصوں میں بھی 2 نومبر سے انسداد پولیو مہم کا آغاز کیا گیا ہے جس کے تحت خیبر پختونخوا کے 27 اضلاع میں پولیو حکام کے مطابق 45 لاکھ سے زائد بچوں کو پولیو کے قطرے پلائے جائیں گے۔

ریسکیو 1122 مہمند کی جانب سے جاری بیان کے مطابق فائرنگ کے نتیجے میں دو پولیس اہلکار، سپاہی ظہور اور سپاہی فضل ربی جاں بحق ہوئے جبکہ سپاہی صابر زخمی ہوا۔

گورنر خیبر پختونخوا فیصل کریم کنڈی اور وزیر داخلہ محسن نقوی کی جانب سے اس واقعے کی مذمت کی گئی ہے۔فیصل کریم کنڈی نے کہا کہ ’ملک و قوم کے تحفظ اور بچوں کے محفوظ مستقبل کے لیے جانوں کا نذرانہ پیش کرنے والے شہدا کی قربانیاں ہمیشہ یاد رکھی جائیں گی۔‘

انہوں نے کہا کہ پولیو ٹیموں اور ان کی حفاظت پر مامور پولیس اہلکاروں کو نشانہ بنانا نہ صرف امن و امان بلکہ بچوں کے روشن اور محفوظ مستقبل پر بھی حملہ ہے۔

گورنر خیبر پختونخوا کی جانب سے جاری بیان میں مغویوں کی باحفاظت بازیابی کے لیے فوری اور موثر اقدامات اٹھانے کی ہدایت کی گئی ہے۔