شعور نیوز(ویب ڈیسک):عالمی بینک نے اپنی تازہ 'انٹرنیشنل ڈیٹ رپورٹ 2026' جاری کرد ی ہے۔رپورٹ کے اعداد و شمار میں یہ ہولناک بات سامنے آئی ہے کہ بھاری سود پر لیا گیا پاکستان کا بیرونی قرضہ 10 سال میں دوگنا ہوگیا ہے ۔بیرونی قرضے میں 107 ارب 7 کروڑ 60 لاکھ ڈالر سرکاری اور حکومتی ضمانت کے تحت حاصل کیے گئے قرضے شامل ہیں۔

رپورٹ میں کہا گیا ہے کہ کسی بھی خطے میں ایک سال کے دوران اس تناسب میں یہ سب سے زیادہ اضافہ ہے، جو بیرونی قرضوں کے بڑھتے ہوئے بوجھ کی نشاندہی کرتا ہے۔رپورٹ کے مطابق 2025 میں چین نے پاکستان کو دیے گئے دو ارب ڈالر کے قرضوں کی واپسی کی مدت میں توسیع کی، جبکہ عالمی مالیاتی فنڈ (آئی ایم ایف) نے توسیعی فنڈ سہولت اور پائیداری و استحکام کی سہولت کے تحت پاکستان کو 2.3 ارب ڈالر کے نئے قرضے فراہم کیے۔

پاکستان کے آئین اور شرعی عدالت کے فیصلوں کے باوجود سودی نظام کا خاتمہ تاحال ممکن نہیں ہو سکا۔عالمی بینک کی اس رپورٹ کے مطابق سرکاری اداروں کا سود تو 3.6 فیصد ہے، لیکن نجی قرض دینے والوں کا سود 8.6 فیصد کی بلند ترین سطح پر ہے۔ اس کا مطلب یہ ہے کہ پاکستان جتنا قرضہ لیتا ہے، اس کا ایک بڑا حصہ صرف سود کی ادائیگی میں اڑ جاتا ہے، اصل رقم وہیں کھڑی رہتی ہے۔

پاکستان پر چڑھے ہوئے اس 135 ارب ڈالر کے قرضے اور سودی نظام کو معاشی اور سیاسی اصطلاح میں استعماری جکڑ بندی اور سرمایہ دارانہ نظام کی جکڑ بندی دونوں کا ملغوبہ کہا جائے گا۔ یہ دونوں نظام الگ نہیں ہیں، بلکہ ایک ہی سکے کے دو رخ ہیں۔

سرمایہ دارانہ نظام کی بنیاد ہی اس اصول پر ہے کہ ’پیسے سے پیسہ بنایا جائے‘ اور اس کا سب سے بڑا ہتھیار سود ہوتا ہے۔عالمی بینک، آئی ایم ایف اور نجی کمرشل بینک غریب ممالک کو اس طرح قرض دیتے ہیں کہ وہ کبھی اصل رقم واپس نہ کر سکیں اور ان کی آنے والی نسلیں صرف سود ادا کرتی رہیں۔

حکومت اپنے پرتعیش اخراجات کم کرنے اور ٹیکس کا دائرہ کار امیروں تک بڑھانے میں کیوں ناکام ہے؟اگر پاکستان اپنی برآمدات اور بیرون ملک مقیم پاکستانیوں کی ترسیلاتِ زر کو اس سطح پر لے آئے جہاں ہمیں ڈالر باہر سے ادھار نہ مانگنے پڑیں، تو عالمی سودی اداروں (IMF اور ورلڈ بینک) کی محتاجی خود بخود ختم ہو جائے گی۔

آئی ایم ایف اور عالمی بینک جب بھی قرض دیتے ہیں، تو وہ پاکستان کو اپنی مرضی کی پالیسیاں بنانے پر مجبور کرتے ہیں۔ پٹرول، بجلی اور گیس کا مہنگا ہونا، غریب پر ٹیکس لگانا اور ملکی اثاثوں کی نجکاری کرنا دراصل ملکی خودمختاری پر استعماری قبضہ ہے۔

چین کا 22.4 ارب ڈالر کا قرض ہو یا مغربی اداروں کا، یہ قرضے صرف معاشی نہیں ہوتے بلکہ ان کے پیچھے پاکستان کی اہم جغرافیائی حیثیت (سی پیک، نیوکلیئر اسٹیٹس) کو کنٹرول کرنے کی خواہش بھی چھپی ہوتی ہے۔

یہ قرضے طویل مدت (اوسط 16 سال) کے لیے ہیں اور ان کی واپسی شروع ہونے سے پہلے 4 سال کی رعایتی مدت (Grace Period) بھی دی گئی ہے۔ اسے مالیاتی زبان میں 'رعایتی قرضہ' (Concessional Debt) کہا جاتا ہے۔

رپورٹ کے مطابق مجموعی بیرونی قرضے میں 107 ارب 7 کروڑ 60 لاکھ ڈالر سرکاری اور حکومتی ضمانت کے تحت حاصل کیے گئے قرضے شامل ہیں، جبکہ نجی شعبے کا 17 ارب 58 کروڑ ڈالر کا ایسا قرضہ بھی موجود ہے جس کی حکومت نے ضمانت نہیں دی۔ اس کے علاوہ قلیل مدتی قرضوں کا حجم 10 ارب 45 کروڑ ڈالر ریکارڈ کیا گیا۔

عالمی بینک کے اعداد و شمار کے مطابق پاکستان کے سرکاری قرضوں میں سے 56 ارب 83 کروڑ ڈالر کثیر ملکی مالیاتی اداروں، 42 ارب 43 کروڑ ڈالر مختلف ممالک جبکہ 7 ارب 80 کروڑ ڈالر نجی قرض دہندگان کے ذمے واجب الادا ہیں۔

چین پاکستان کا سب سے بڑا انفرادی قرض دہندہ ہے، جس کے 22 ارب 40 کروڑ ڈالر پاکستان کو واپس کرنے ہیں۔ اسی طرح عالمی بینک کے 19 ارب 20 کروڑ ڈالر اور ایشیائی ترقیاتی بینک کے 16 ارب 83 کروڑ ڈالر کے قرضے بھی پاکستان کے ذمے ہیں۔

سود پر مبنی معیشت کا سب سے بڑا نقصان یہ ہے کہ یہ دولت کو چند ہاتھوں میں مرکوز کر دیتی ہے۔ پاکستان اپنی برآمدات کا 33 فیصد سے زائد حصہ صرف بیرونی قرضوں اور سود کی ادائیگی پر خرچ کر رہا ہے۔ جب ملک کی کمائی کا ایک تہائی حصہ سود خوروں کی جیب میں چلا جائے گا، تو عوام کے لیے ہسپتال، اسکول اور روزگار کیسے فراہم ہو گا؟

چین سے لیے گئے قرضے (جو کہ 22.4 ارب ڈالر ہیں) کا بڑا حصہ پاک چین اقتصادی راہداری (CPEC) کے تحت بجلی کے بڑے منصوبوں (کول، ہائیڈرو، اور سولر پاور پلانٹس)، موٹرویز، اور گوادر پورٹ کی تعمیر پر لگایا گیا۔ اسی طرح عالمی بینک اور ایشیائی ترقیاتی بینک (ADB) کے قرضے سڑکوں، ڈیموں، تعلیمی و صحت کے اصلاحاتی پروگراموں اور ماحولیاتی تبدیلیوں سے نمٹنے کے لیے استعمال ہوئے۔پاکستان کے قرضوں کا ایک بہت بڑا حصہ کسی ترقیاتی کام پر نہیں لگا، بلکہ پرانے قرضوں کی قسطیں اور سود ادا کرنے، درآمدات (پٹرول، گاز، مشینری) کے بل دینے اور ملکی بجٹ کے خسارے کو پورا کرنے کے لیے استعمال ہوا۔ آئی ایم ایف (IMF) سے ملنے والے قرضے (جیسے 2025 میں ملنے والے 2.3 ارب ڈالر) صرف معاشی استحکام اور اسٹیٹ بینک کے ذخائر کو سہارا دینے کے لیے ہوتے ہیں۔

رپورٹ میں بتایا گیا ہے کہ سرکاری مالیاتی اداروں سے حاصل کیے گئے قرضوں کی واپسی کی اوسط مدت 16 سال ہے، جبکہ ان پر اوسط شرح سود 3.6 فیصد مقرر ہے۔ ان قرضوں کی ادائیگی شروع ہونے سے پہلے چار سال کی رعایتی مدت بھی دی جاتی ہے۔

اس کے برعکس نجی قرض دہندگان سے حاصل کیے گئے قرضوں پر اوسط شرح سود 8.6 فیصد ہے، جبکہ ان کی واپسی کی اوسط مدت تین سال اور رعایتی مدت صرف ایک سال ہے۔