شعور نیوز( انٹرنیشنل ڈیسک):علاقائی جنگ کی ہولناکی زمین، فضا کے بعد سمندر کو بھی برباد کر رہی ہے ۔دنیا کی اہم بحری گزرگاہ آبنائے ہرمز بدترین سمندری آلودگی کی لپیٹ میں ہے۔ 6نومبر2026 کو سمندری پانیوں میں بچھائی گئی بارودی سرنگوں سے ٹکرا کر خام تیل سے بھرے دو آئل ٹینکرز میں خوفناک دھماکے ہوئے، جس کے بعد دونوں جہاز آگ کے گولے میں تبدیل ہو گئے۔جہازوں میں شگاف پڑنے سے ہزاروں ٹن خام تیل تیزی سے کھلے سمندر میں بہہ رہا ہے، جس نے پانی کی سطح پر ایک بڑی زہریلی طے بچھا دی ہے۔ یہ حادثہ صرف معاشی یا جنگی نقصان نہیں، بلکہ سمندری زندگی کے لیے ایک مطلق تباہی بن چکا ہے۔

مشرقِ وسطیٰ میں 28 فروری کو جنگ شروع ہونے کے بعد سے ایران نے آبنائے ہرمز سے بحری آمدورفت محدود کرنے کی کوشش کی ہے۔ یہ اہم سمندری گزرگاہ عالمی توانائی کی ترسیل کے لیے انتہائی اہمیت رکھتی ہے، جہاں سے معمول کے حالات میں دنیا کی مجموعی کھپت کا تقریباً پانچواں حصہ تیل گزرتا ہے۔

امریکی سینٹرل کمانڈ نے گزشتہ ماہ کہا تھا کہ اس نے موسمِ گرما سے اب تک خلیجی ممالک کو آبنائے ہرمز کے ذریعے ڈیڑھ ارب بیرل تیل برآمد کرنے میں مدد فراہم کی ہے۔ امریکی کمانڈ کے مطابق اس آبی گزرگاہ سے تمام بارودی سرنگیں صاف کردی گئی ہیں۔

ایرانی سرکاری ٹی وی پر نشر ہونے والے بیان کے مطابق پاسدارانِ انقلاب نے کہا کہ دونوں جہازوں نے آبنائے ہرمز سے گزرنے کے لیے غیر مجاز راستہ اختیار کیا تھا۔ ان میں سے ایک جہاز آبنائے ہرمز کے مشرق میں جبکہ دوسرا آبنائے کے اندر موجود تھا۔

تباہ کن دھماکوں کی آوازیں دور دور تک سنی گئیں، جبکہ فضا میں بلند ہوتے ہوئے سیاہ دھوئیں کے دیوہیکل بادلوں نے پورے افق کو تاریک کر دیا ہے۔ جنگ کے آغاز سے ہی ایران کی جانب سے اس اہم ترین آبنائے سے بحری آمدورفت کو محدود کرنے کی کوششیں کی جا رہی تھیں، جس نے اب ایک بدترین تباہی کا روپ دھار لیا ہے۔

سب جانتے ہیں کہ سمندر میں اس تیل کے جانے سے یہ پانی میں جذب نہیں ہوتا بلکہ ایک خطرنا ک زہر میں تبدیل ہو کر ماحولیاتی اور سمندری حیات کے لیے مستقل قیامت بن جاتا ہے۔

سمندر پر تیل کی موٹی تہہ جم جانے کے باعث سورج کی روشنی اور آکسیجن کا سمندری پانی میں داخلہ مکمل طور پر بند ہو گیا ہے، جس سے لاکھوں مچھلیوں اور نایاب آبی مخلوق کا دم گھٹ رہا ہے۔

تیل کی اس زہریلی دلدل میں پھنس کر ہزاروں پرندے پرواز کی صلاحیت سے محروم ہو کر تڑپ تڑپ کر جان دے رہے ہیں۔ آبنائے ہرمز کا نازک ایکو سسٹم اور زیرِ آب پائے جانے والے نایاب مرجانی چٹانیں (Coral Reefs) مکمل طور پر تباہی کے دہانے پر پہنچ چکے ہیں۔

ماحولیاتی ماہرین نے خبردار کیا ہے کہ اگر اس تیل کے پھیلاؤ کو فوری طور پر نہ روکا گیا تو اس علاقے میں آبی حیات کی کئی نسلیں ہمیشہ کے لیے مٹ جائیں گی، اور اس زہر کے اثرات کو زائل کرنے میں دہائیاں لگ سکتی ہیں۔جنگ کی اس ہولناک پیش رفت نے نائجیریا سے لے کر عالمی منڈیوں تک ہلچل مچا دی ہے، جبکہ ماہرینِ ماحولیات اسے اس صدی کا بدترین بحری و ماحولیاتی سانحہ قرار دے رہے ہیں۔

اب اس تباہی سے نہ ایران کو کوئی تکلیف ہے اور نہ امریکہ کو۔ اگر امریکہ دنیا کا چوہدری بنتا ہے اور سب جانتے ہیں کہ اس جنگ کو امریکہ نے ہی مسلط کیا ہے تو اصلاً امریکہ ہی اس تباہی کا ذمہ دار کہلائے گا۔