شعور نیوز(ویب ڈیسک):بلوچستان ہائی کورٹ نے نو سال قبل کوئٹہ میں گاڑی کی ٹکر سے ٹریفک پولیس اہلکار کی موت کے مقدمے میں سابق رکن صوبائی اسمبلی اور پبلک اکاؤنٹس کمیٹی کے سابق چیئرمین عبدالمجید خان اچکزئی کی بریت کا فیصلہ کالعدم قرار دیتے ہوئے انہیں 10 سال قید بامشقت کی سزا سنا دی ہے۔2017 کے ایک کھلے اور واضح واقعے کا حتمی فیصلہ (ہائی کورٹ کی سطح پر) آنے میں نو سال لگ گئےوہ بھی حکومت کی جانب سے دائر کردہ ایک اپیل پر ۔

ایڈیشنل سیشن جج ششم کوئٹہ کو ہدایت کی گئی کہ ضمانت پر موجود عبدالمجید اچکزئی کی فوری گرفتاری کے لیے ناقابل ضمانت وارنٹ جاری کیے جائیں اور متعلقہ حکام قانون کے مطابق ان پر فوری عمل درآمد یقینی بنائیں۔

اس دوران مظلوم کا خاندان اور عام عوام نظامِ انصاف سے مایوس ہوتے رہے کیونکہ کورٹ عدم ثبوت پر باعزت بری کر چکی تھی۔2017 میں ملزم کو ضمانت اور 2020 میں بریت ملی اور مزید 6 سال بعدہائی کورٹ کے فیصلے تک ملزم سالہا سال آزادی سے گھومتا رہااور اب مفرور ہے۔

عدالت نے قومی اسمبلی میں اپوزیشن لیڈر محمود خان اچکزئی کے قریبی رشتہ دار اور پشتونخوا ملی عوامی پارٹی کے صوبائی سیکرٹری عبدالمجید اچکزئی کی فوری گرفتاری کے لیے ناقابل ضمانت وارنٹ جاری کرنے اور انہیں سزا بھگتنے کے لیے جیل بھیجنے کا حکم بھی دیا ہے۔

20 جون 2017 کو کوئٹہ کے مصروف علاقے زرغون روڈ پر جی پی او چوک میں ڈیوٹی انجام دینے والے ٹریفک سارجنٹ حاجی عطا اللہ کو ایک تیز رفتار سرکاری لینڈ کروزر نے، جس کا رجسٹریشن نمبر BD-4381 تھا، ٹکر مار دی تھی۔ پولیس نے ابتدائی طور پر ٹریفک انسپکٹر کے قتل کا مقدمہ نامعلوم افراد کے خلاف درج کر لیا۔ تاہم جب واقعے کی سی سی ٹی وی فوٹیج میڈیا پر نشر ہوئی تو مجید خان اچکزئی کو تین دن بعد گرفتار کر لیا گیا۔ستمبر 2020 میں ٹرائل کورٹ نے مجید اچکزئی کو عدم ثبوت کی بنیاد پر بری کردیا تھا ۔

عبدالمجید اچکزئی کی بریت کے خلاف حکومت کی جانب سے اپیل دائر کی گئی ۔جسٹس محمد عامر نواز رانا اور جسٹس عبدالقیوم لہڑی پر مشتمل بلوچستان ہائی کورٹ کے دو رکنی بینچ نے سماعت کی ۔

عدالت نے اپیل منظور کرتے ہوئے ایڈیشنل سیشن جج ششم اور ماڈل کریمنل ٹرائل کورٹ دوم کوئٹہ کا چار ستمبر 2020 کو سنایا گیا بریت کا فیصلہ کالعدم قرار دے دیا۔

عدالت نے عبدالمجید اچکزئی کو تیز رفتاری، غفلت اور لاپروائی سے گاڑی چلاتے ہوئے ٹریفک سب انسپکٹر حاجی عطااللہ کی موت کا سبب بننے پر تعزیرات پاکستان کی دفعہ 320 کے تحت مجرم قرار دیا اور 10 سال قید بامشقت کی سزا سنائی۔

حادثے میں حاجی عطااللہ شدید زخمی ہوئے اور انہیں سول ہسپتال کوئٹہ منتقل کیا گیا جہاں وہ دوران علاج دم توڑ گئے۔ اس واقعے میں ایک سائیکل سوار عبدالغفور بھی زخمی ہوا تھا۔

مجید اچکزئی پر الزام عائد کیا گیا تھا کہ انہوں نے ٹریفک پولیس اہلکار کی جانب سے رکنے کا اشارہ کیے جانے کے باوجود گاڑی نہیں روکی اور اسے ٹکر مار دی۔

ابتدائی طور پر سول لائنز پولیس نے نامعلوم افراد کے خلاف ٹریفک حادثے کا مقدمہ درج کیا تھا تاہم واقعے کی سی سی ٹی وی فوٹیج سامنے آنے اور سوشل میڈیا پر وائرل ہونے کے بعد معاملے نے غیر معمولی توجہ حاصل کی۔

واقعے کے پانچ روز بعد، 25 جون 2017 کو پولیس نے عبدالمجید اچکزئی کو کوئٹہ کے علاقے سیٹلائٹ ٹاؤن میں ان کی رہائش گاہ سے گرفتار کرلیا تھا۔گرفتاری سے قبل مجید اچکزئی نے ایک ٹی وی انٹرویو میں تسلیم کیا تھا کہ واقعے کے وقت گاڑی وہ خود چلا رہے تھے تاہم انہوں نے اسے ایک حادثہ قرار دیا تھا۔انہوں نے یہ بھی کہا تھا کہ وہ متاثرہ خاندان کے ساتھ قبائلی روایات کے مطابق معاملہ طے کرنا چاہتے ہیں۔پولیس نے واقعے کے بعد ان کے خلاف قتل، اقدام قتل اور دہشت گردی کی دفعات کے تحت مقدمات درج کیے تھے۔کورٹ میں اچکزئی نے بیان بدل لیااور اپنے مفرور ڈرائیور پر الزام لگا دیا

29 دسمبر 2017 کو انسداد دہشت گردی کی عدالت نے مجید اچکزئی کی ضمانت منظور کرلی تھی جس کے بعد انہیں جیل سے رہا کردیا گیا تھا۔

بعد ازاں ثبوت ناکافی ہونے کی بنیاد پر مقدمے سے دہشت گردی کی دفعہ ختم کردی گئی اور کیس کو ماڈل کریمنل ٹرائل کورٹ منتقل کردیا گیا۔

تقریباً تین سال تک مقدمے کی سماعت جاری رہنے کے بعد چار ستمبر 2020 کو کوئٹہ کی ماڈل کورٹ کے جج دوست محمد مندوخیل نے عدم ثبوت کی بنیاد پر عبدالمجید اچکزئی کو بری کردیا تھا۔

تاہم سرکاری استغاثہ نے اس فیصلے کو بلوچستان ہائی کورٹ میں چیلنج کیا جہاں اپیل کی سماعت کے بعد اب بریت کا فیصلہ کالعدم قرار دے کر انہیں سزا سنائی گئی ہے۔

عبدالمجید خان اچکزئی پشتونخوا ملی عوامی پارٹی کے رہنما اور سابق رکن بلوچستان اسمبلی ہیں۔وہ 2013 کے عام انتخابات میں بلوچستان اسمبلی کے حلقہ پی بی 13 سے پارٹی کے ٹکٹ پر کامیاب ہوئے تھے۔ وہ بلوچستان اسمبلی میں پبلک اکاؤنٹس کمیٹی کے چیئرمین بھی رہ چکے ہیں اور اس وقت پارٹی کے صوبائی سیکرٹری کے طور پر کام کر رہے ہیں۔عبدالمجید اچکزئی قومی اسمبلی میں قائد حزب اختلاف اور پشتونخوا ملی عوامی پارٹی کے سربراہ محمود خان اچکزئی کے قریبی رشتہ دار بھی ہیں۔بلوچستان ہائی کورٹ کے حالیہ فیصلے کے بعد 2017 میں پیش آنے والے اس واقعے کا مقدمہ ایک نئے قانونی مرحلے میں داخل ہوگیا ہے۔