شعور نیوز( ویب ڈیسک):صوبہ پنجاب کے اہم شہروں خصوصاً لاہور میں کھانستی ہوئی تکلیف دہ موت کا موسم شروع ہوگیا۔ محکمہ موسمیات کی جاری کردہ رپورٹس کے مطابق 2 سے 8 نومبر کے دوران لاہور میں پی ایم 2.5 کی اوسط مقدار 214 مائیکروگرام فی مکعب میٹر ریکارڈ کی گئی، جو عالمی ادارہ صحت (WHO) کی مقرر کردہ حد سے تقریباً 14 گنا زیادہ ہے۔یونیورسٹی آف شکاگو اور مختلف ماحولیاتی جائزوں کے مطابق، لاہور کی زہریلی فضا کی وجہ سے یہاں کے شہریوں کی متوقع اوسط عمر ساڑھے 6 سال تک کم ہو رہی ہے۔ اسموگ کے سیزن (اکتوبر سے دسمبر) میں شہریوں کی ایک بڑی تعداد آنکھوں میں جلن، سرخی اور گلے کی خرابی کا شکار ہو کر ہسپتالوں کا رخ کرتی ہے۔

لاہور میں فضائی آلودگی اور اسموگ (Smog) کا معاملہ 2016 اور 2017 سے شدید بحران کی شکل میں نمایاں ہونا شروع ہوا۔ اگرچہ اس سے پہلے بھی سردیوں میں دھند کی شکایت رہتی تھی، لیکن 2016 کے بعد سے یہ مسئلہ اتنا مستقل اور سنگین ہو گیا کہ ماہرین اب اسے لاہور کا ’’پانچواں موسم‘‘ کہنے لگے ہیں۔ گزشتہ ایک دہائی کے دوران تیز رفتار شہر کاری ، گاڑیوں کے دھوئیں، فیکٹریوں کے اخراج اور سردیوں میں فصلوں کی باقیات جلائے جانے کی وجہ سے یہ مسئلہ سنگین ترین ہو چکا ہے اور لاہور اکثر دنیا کے آلودہ ترین شہروں کی فہرست میں پہلے نمبر پر آ جاتا ہے۔

سینئر صوبائی وزیر مریم اورنگزیب نے لاہور کی فضائی آلودگی میں اضافے کی بڑی وجہ سرحد پار بھارت میں دیوالی کے موقع پر بڑے پیمانے پر ہونے والی آتش بازی قرار دے دی۔اہم بات یہ ہے کہ دیوالی تو پاکستان و بھارت میں ہر سال ہی منائی جا رہی ہے۔وزیر کے مطابق بھارتی شہروں سے آنے والی آلودہ ہواؤں نے لاہور کا ایئر کوالٹی انڈیکس بڑھادیا۔

صوبائی وزیر کے مطابق پنجاب حکومت نے مقامی سطح پر آلودگی پھیلانے والے عوامل پر سخت کنٹرول کیا ہے اور پیشگی حفاظتی اقدامات مؤثر ثابت ہوئے۔ دیوالی کے موقع پر فضائی آلودگی کے باوجود لاہور کا اے کیو آئی پیش گوئی کی سطح سے تجاوز نہیں کر سکا۔صوبائی وزیر کا کہنا تھا کہ آئندہ دو سے تین گھنٹوں میں ہوا کے رخ اور رفتار میں تبدیلی سے صورتحال مزید بہتر ہونے کی توقع ہے، جبکہ دھوپ نکلنے سے بھی فضائی آلودگی میں کمی آنے کا امکان ہے۔ وزیراعلیٰ مریم نواز شریف کی ہدایت پر تمام متعلقہ محکمے مسلسل فیلڈ میں متحرک ہیں۔

مریم اورنگزیب نے شہریوں کو احتیاطی تدابیر اختیار کرنے کی ہدایت کرتے ہوئے کہا کہ بچے، بزرگ، حاملہ خواتین اور سانس، دل اور پھیپھڑوں کے مریض اے کیو آئی میں کمی آنے تک گھروں میں رہیں۔ شہری صبح کی سیر، جاگنگ، سائیکلنگ اور دیگر بیرونی سرگرمیاں عارضی طور پر معطل رکھیں۔

انہوں نے مزید کہا کہ آلودہ ہوا سے بچاؤ کے لیے گھروں، دفاتر اور دیگر عمارتوں کی کھڑکیاں، روشن دان اور دروازے بند رکھے جائیں۔ گاڑی میں سفر کے دوران کھڑکیاں بند اور اے سی کا ری سرکولیشن موڈ فعال رکھا جائے۔صوبائی وزیر نے شہریوں کو ہدایت کی کہ گھروں اور اطراف میں کچرا، پتے یا دیگر اشیا جلانے سے مکمل اجتناب کریں اور فضائی آلودگی سے بچاؤ کے لیے محکمہ ماحولیات (ای پی اے) کی جاری کردہ حفاظتی ہدایات پر عمل کریں۔

اس پوری صورتحال میں مسئلہ یہی ہے کہ بغیر، نقصانات، بحران و تباہی کا اندازہ کیے جس جدید ترقی کے ماڈل کو مطمع نظر بنایا گیا ہے یہ ساری تباہی تو وہیں سے آرہی ہے ،اُس کو روکے ختم کرنے کی کوئی پالیسی نہیں ۔