شعور نیوز(انٹرنیشنل ڈیسک):مقبوضہ جموں و کشمیر کے اضلاع کولگام اور کشتواڑ میں سکیورٹی فورسز پر ہونے والے مجاہدین کے حملوں اور دو بھارتی فوجیوں کی ہلاکت کے بعد بھارتی فوج، پیرا ملٹری فورسز (سی آر پی ایف) اور پولیس نے وادی بھر میں بڑے پیمانے پر محاصرے، تلاشی کی کارروائیاں اور سخت پابندیاں نافذ کر دی ہیں۔ ان کارروائیوں کے نتیجے میں مقامی آبادی کو شدید مشکلات اور ہراسانی کا سامنا ہے، جبکہ درجنوں شہریوں کو پوچھ گچھ کے نام پر حراست میں لے لیا گیا ہے۔اکتوبر 1947سے بھارتی فوج کے مظالم اور مقبوضہ کشمیرپر ناجائز ظالمانہ قبضے کے خلاف عسکری ایمانی نوعیت کا رد عمل ساری تدابیر کے باوجود ختم نہیں ہورہا۔

محاصرہ اور شہریوں کی گرفتاریاں: کولگام کے علاقے نوپورہ اکھرن (میر بازار کے قریب) میں سی آر پی ایف کی 46ویں بٹالین کے ناکے پر حملے کے بعد شروع ہونے والا مشترکہ سرچ آپریشن آج تیسرے روز بھی جاری ہے۔ بھارتی فوج کی 15 کور کے کمانڈر نے متاثرہ علاقے کا دورہ کر کے آپریشن مزید تیز کرنے کی ہدایت دی ہے۔ اطلاعات کے مطابق سرچ آپریشن کے دوران گھر گھر تلاشی لی جا رہی ہے اور متعدد مقامی نوجوانوں و مشتبہ افراد کو حراست میں لے کر نامعلوم مقامات پر منتقل کر دیا گیا ہے۔
شاہراہوں پر سخت ناکہ بندی اور تلاشی: سرینگر۔جموں قومی شاہراہ اور ملحقہ راستوں پر بکتر بند گاڑیاں تعینات کر کے خصوصی چیک پوسٹیں قائم کر دی گئی ہیں، جہاں مسافروں اور گاڑیوں کی جامہ تلاشی کے باعث معمولاتِ زندگی بری طرح مفلوج ہو کر رہ گئے ہیں۔
کشتواڑ میں پوسٹرز اور انعامات کا اعلان: ضلع کشتواڑ کے دور افتادہ جنگلاتی علاقے دچھن سے دو سپیشل پولیس افسران (ایس پی اوز) بابی چند اور رشپال کمار کی گولیوں سے چھلنی لاشیں ملنے کے بعد پورے ضلع میں سکیورٹی مزید سخت کر دی گئی ہے۔ پولیس نے مختلف چیک پوسٹوں پر تین مشتبہ افراد کے پوسٹرز آویزاں کر کے ان کی اطلاع دینے والے کے لیے 30 لاکھ روپے انعام کا اعلان کیا ہے، جبکہ کولگام واقعے میں مبینہ طور پر ملوث مقامی نوجوان محمد لطیف بٹ کی گرفتاری کے لیے 15 لاکھ روپے انعام مقرر کیا گیا ہے۔
زخمی اہلکاروں کی صورتحال اور اعلیٰ سطحی ردعمل: کولگام حملے میں زخمی ہونے والے تین سی آر پی ایف اہلکاروں—ہیڈ کانسٹیبل سومویر سنگھ، کانسٹیبل راکیش داس اور کانسٹیبل سنتوش چندرو—میں سے ایک کو تشویشناک حالت کے باعث ایئر لفٹ کر کے سرینگر کے 92 بیس ہسپتال منتقل کیا گیا ہے، جبکہ دیگر دو اننت ناگ اور کولگام کے ہسپتالوں میں زیرِ علاج ہیں۔ دوسری جانب مقبوضہ کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ نے کشتواڑ میں اہلکاروں کی ہلاکت پر گہرے رنج و غم کا اظہار کیا ہے۔

انسانی حقوق اور عوامی حلقوں کی تشویش:

مقامی ذرائع اور انسانی حقوق کے مبصرین کا کہنا ہے کہ بھارتی فورسز ہر ایسے واقعے کے بعد اجتماعی سزا (Collective Punishment) کی پالیسی اپناتے ہوئے پورے دیہات اور جنگلاتی بستیوں کا محاصرہ کر لیتی ہیں۔ کریک ڈاؤن اور ’فری ہینڈ‘ دیے جانے کے بعد نہتے کشمیریوں کی بلاجواز گرفتاریوں، نقل و حرکت پر پابندیوں اور روزمرہ زندگی میں خلل کے واقعات میں تشویشناک اضافہ ہوا ہے، جس سے وادی میں خوف و ہراس کی فضا مزید گہری ہو گئی ہے۔

مقبوضہ جموں و کشمیر میں 1989ء سے جاری جدوجہدِ آزادی کے دوران بھارتی سکیورٹی فورسز کے ہاتھوں ہونے والی انسانی حقوق کی خلاف ورزیوں کے مستند اعداد و شمار مختلف بین الاقوامی انسانی حقوق کی تنظیموں (جیسے ایمنسٹی انٹرنیشنل، ہیومن رائٹس واچ)، اقوام متحدہ کے ہائی کمشنر برائے انسانی حقوق (OHCHR) کی رپورٹس، اور مقامی دستاویزی اداروں (جیسے Jammu Kashmir Coalition of Civil Society - JKCCS، Association of Parents of Disappeared Persons - APDP، اور کشمیر میڈیا سروس) کی تحقیق پر مبنی ہیں۔

مجموعی شہادتیں: مقامی و بین الاقوامی انسانی حقوق کے مانیٹرنگ اداروں کے مطابق، جنوری 1989ء سے اب تک بھارتی فورسز کے ہاتھوں 96,000 سے زائد کشمیری شہید ہو چکے ہیں۔
حراستی قتل (Custodial Killings): ان میں سے 7,300 سے زائد افراد کو دورانِ حراست تشدد یا جعلی مقابلوں (Fake Encounters) میں قتل کیا گیا۔
بچے اور خواتین: شہید ہونے والوں میں 800 سے زائد بچے اور 2,300 سے زائد خواتین شامل ہیں۔