شعور نیوز( ویب ڈیسک): کراچی کے تعلیم یافتہ نوجوان امیر بننے کی خاطر بھیانک شیطانی مافیاز کی صورت بے نقاب ہو رہے ہیں۔وفاقی ادرے نے کراچی میں سوشل میڈیا ، ڈیزائننگ کے کاموں سے متعلق تین دفاتر سے 42 ملزمان گرفتار کرکے 12 بچوں کو بھی بازیاب کرایا ہے ، ڈالر وں کی قیمت پر بچوں کی غیر اخلاقی اینیمیٹڈ ویڈیوز بنا کر فروخت کیا کرتے تھے۔یہ وہ جدید تعلیم کی غلاظت ہے جو انسانی اخلاقیات کی تمام حدوں کو ازخود پار کر ادیتی ہے کیونکہ اس میں اخلاقیات کا کوئی وجود نہیں ہوتاصرف عقلیات ہوتی ہیں جو حصول پیسہ پر بنتی ہے۔

نیشنل سائبر کرائم انویسٹی گیشن ایجنسی نے کراچی کے علاقے گلستانِ جوہر کے رابعہ سٹی فلیٹس پر چھاپہ مار کر ایک بین الاقوامی ریکیٹ کا پردہ فاش کردیا۔ یہ اعلیٰ تعلیم یافتہ نوجوان کم عمر بچوں کی غیر اخلاقی ویڈیوز تیار کر کے اینیمیشن میں تبدیل کرتے تھے اور پھر امریکا اور جرمنی سمیت بیرونِ ملک یہ وڈیوز فروخت کی جاتی تھیں۔

کہنے کو یہ صرف ایک سادہ سی کاروباری سرگرمی ہے لیکن یہ زوال و اخلاقی پستی کی شرمناک مثال ہے۔ یہ ایک ایسا آئینہ ہے جو ہمیں دکھاتا ہے کہ جدید ٹیکنالوجی کی تعلیم حاصل کرنے والے نوجوان دراصل کس گھناؤنے انجام کی طرف بڑھ رہے ہیں۔

جوڈیشل مجسٹریٹ شرقی کی عدالت میں سائبر کرائم حکام نے 10 سے زائد ملزمان کو پیش کیا، کورٹ نے تمام ملزمان کا 4 روزہ جسمانی ریمانڈ منظور کرتے ہوئے انہیں سائبر کرائم حکام کے حوالے کر دیا۔

وفاقی ادارے کی جاری کردہ پریس ریلیز کے مطابق ملزمان "آرٹس ڈیزائن"، "پکسل کرافٹ" اور "آرٹ آفس" کے نام سے باقاعدہ کمپنیاں چلا رہے تھے ۔ ایک ظاہری طور پر "قانونی" کاروباری سہارے کے پیچھے چلنے والا گھناؤنا دھندہ تھا۔ کمپنی کے ملزمان سوشل میڈیا پلیٹ فارمز کے ذریعے بیرونِ ملک کلائنٹس سے رابطہ کرتے تھے۔ فی بچہ وڈیو کا نرخ کلائنٹ سے پاکستانی تقریباً 28,000 روپے لیاجاتا جس میں سے بچے کو محض 6,000 روپے بطور اجرت دیے جاتے تھے۔ بچے کے لیے 6 ہزار روپے کی عیاشی بہت تھی۔ اس کی عزت، اس کی معصومیت، اس کی پوری زندگی کو سوشل میڈیا پر پھیلنا اُس کے لیے بے معانی تھا۔ یوں 100 بچوں کی تصاویر لینے کے 22لاکھ روپے مافیا کے ہاتھ آجاتے ۔ اہم بات یہ ہے ریاست اس بات پر خوش ہوتی کہ زرمبادلہ یعنی ڈالر آرہے ہیں ۔

اس کمپنی کے ملازمین سوشل میڈیا پلیٹ فارم جن میں انسٹاگرام اور ٹوئٹر بھی شامل ہیں وہاں پر خواتین کے نام سے پروفائل بناتے اور بین الاقوامی کلائنٹ سے رابطہ کرتے، انہی اکاؤنٹس کے ذریعے انہیں ویڈیوز بھیجی جاتی ، تینوں کمپنیوں پر چھاپے کے دوران 40 سے زائد موبائل فون بھی برامد کیے گئے جنہیں فورنزک کے لیے بھیجا گیا ہے۔

یہ بھیانک دھندہ جدید ٹیکنالوجی کی مکمل معاونت کے بغیر ممکن نہیں تھا۔غیر اخلاقی مواد کو ’اینیمیٹڈ‘ شکل دے کر اسے مزید خطرناک بنا دیا گیا ہے کیونکہ اینیمیشن میں اصل بچے کی شناخت چھپ جاتی ہے، لیکن استحصال کا عمل ویسا ہی رہتا ہے۔

ڈارک ویب تک رسائی اور بعض میسجنگ ایپس نے بچوں کو براہِ راست اس جال تک پہنچایا۔آن لائن کانٹینٹ دیکھتے ہوئے آنے والے اشتہارات میں بگ موجود ہیں جو بچوں کو مزید خطرے میں ڈالتے ہیں۔یہ وہی ٹیکنالوجی ہے جسے "جدید تعلیم" اور "ڈیجیٹل مہارت" کا نام دیا جاتا ہے۔ پاکستا ن میں مستقل بڑھتے سائبر کرائم نے بتا دیا ہے کہ یہ مہارت اصلاً کس مقصد کے لیے استعمال ہو رہی ہے؟ یہ ساری ٹیکنالوجی اصلاً سرمایہ دارانہ نظام کو تقویت دینے کے لیے بنائی گئی ہے تو یہ کیسے کسی اخلاقیات کی پابند ہو سکتی ہے؟

یہی وہ نفسیاتی جال ہے جس میں جدید تعلیم یافتہ نوجوان پھنس رہا ہے: ٹیکنالوجی سیکھی، مہارت حاصل کی، لیکن مقصد کھو گیا۔ جب مقصد صرف پیسہ ہو، تو اخلاقیات ایک "آپشن" بن جاتی ہے — اور اکثر نظر انداز کر دی جاتی ہے۔

جدید ٹیکنالوجی کو جو لوگ اوزار سمجھتے ہیں اُن کے پاس اس بھیانک صورتحال کے بعد کوئی جواب نہیں کیونکہ پورا نظام ، جدیدیت کی چکا چوند، نئی مہنگی گاڑی، نیا مہنگا موبائل ، مہنگے کپڑے جوتے پر کھڑا لائف اسٹائل مستقل سرمایہ مانگتا ہے ، اسکے لیے بندوبست کرنا پھر ایک عقلی جواز ہوجاتا ہے۔