شعور نیوز( ویب ڈیسک):صوبہ خیبر پختونخوا میں نافذ گورنر راج کے دوران حکمران اشرافیہ اور عوام کے درمیان ترجیحات کا خوفناک تضاد ایک بار پھر کھل کر سامنے آگیا ہے۔ 11 نومبر کو کوہاٹ میں سونے کی غیر قانونی مائننگ کے خلاف کارروائی کر کے واپس لوٹنے والی پولیس پارٹی پر مافیا کے حملے میں ڈی ایس پی حیدر زمان اور سب انسپکٹر مختیار سمیت 10 سے 11 پولیس اہلکارجاں بحق ہوگئے ۔اتنے بڑے قومی سانحے کے بعد پشاور کے گورنر ہاؤس میں اسی رات شہداء کے سوگ اور احترام کو بالائے طاق رکھتے ہوئے ’کلچرل نائٹ‘ کے نام پر رقص و موسیقی کی رنگا رنگ محفل سجائی گئی۔گورنر خیبر پختونخوا نے اس رات کلچرل ایونٹ میں شرکت نہیں کی لیکن ایونٹ کو ختم بھی نہیں کیا۔
کوہاٹ اور کرک کے درمیانی علاقے دربوکچ جلندھر بانڈہ میں پولیس ٹیم غیر قانونی گولڈ مائننگ کے خلاف کامیاب آپریشن مکمل کر کے واپس آ رہی تھی کہ جرائم پیشہ عناصر کے ایما پر شدت پسندوں نے گھات لگا کر حملہ کر دیا۔جس وقت کوہاٹ اور خیبر پختونخوا کے دیگر اضلاع میں شہداء کے جسدِ خاکی گھروں کو پہنچ رہے تھے اور ان کے لواحقین غم سے نڈھال تھے، عین اسی وقت صوبے کے سب سے بڑے آئینی مرکز یعنی گورنر ہاؤس پشاور میں طبلے کی تھاپ اور موسیقی کی دھنوں پر محفلیں جمی ہوئی تھیں۔صوبے میں گورنر راج کے نفاذ کے باعث تمام تر انتظامی و ریاستی اختیارات براہِ راست گورنر ہاؤس کے پاس ہیں۔ ایسے حساس وقت میں جب ریاست کے محافظوں کا لہو ابھی خشک بھی نہیں ہوا تھا، سرکاری سرپرستی میں ہونے والی اس "کلچرل نائٹ" نے کئی سنجیدہ سوالات کھڑے کر دیے ہیں:

مخصوص لبرل اقدار کا فروغ: ناقدین اور عوامی حلقوں کا کہنا ہے کہ پختونخوا کی غیور اور اسلامی روایات کی امین سرزمین پر "کلچر" کے نام پر رقص و سرود کی ایسی محفلیں درحقیقت ایک مخصوص استعماری اور لبرل کلچر کو سرکاری سطح پر مسلط کرنے کا ایجنڈا ہیں۔ پولیس کے جنازوں کے دوران اس قسم کی سرگرمیوں کا انعقاد اس بات کا ثبوت ہے کہ مقتدر طبقہ مقامی اقدار اور انسانی ہمدردی سے مکمل طور پر کٹ چکا ہے۔

گورنر ہاؤس کی وضاحت: عوامی تنقید کے بعد گورنر ہاؤس کے ترجمان کی جانب سے یہ جواز پیش کیا گیا کہ یہ تقریب پہلے سے طے شدہ تھی اور گورنر فیصل کریم کنڈی نے موسیقی پروگرام میں شرکت نہیں کی۔ تاہم سیاسی و سماجی مبصرین نے اس وضاحت کو مسترد کرتے ہوئے سوال اٹھایا ہے کہ کیا 10 سے زائد پولیس شہداء کے خون کا احترام اتنا بھی نہیں تھا کہ ایک تفریحی تقریب کو ملتوی کر دیا جاتا؟ قیادت محض رسمی تعزیتی بیانات جاری کرنے کا نام نہیں بلکہ عمل سے یکجہتی دکھانے کا تقاضا کرتی ہے۔اصلاً یہ عمل خود ایک انسانی لاتعلقی پر کھڑی لبرل اقدار کو ہی پھیلاتا ہے ۔

گورنر ہاؤس میں ہونے والی اس تقریب کی ویڈیوز اور تصاویر منظرِ عام پر آنے کے بعد سوشل میڈیا پر شدید غم و غصے کی لہر دوڑ گئی ہے۔ صارفین نے اسے شہداء کے خون سے مذاق اور ریاستی بے حسی کی بدترین مثال قرار دیا ہے۔

صارفین کا کہنا ہے کہ ایک طرف غریب گھرانوں کے سپوت ریاست کی رٹ قائم کرتے ہوئے اپنی جانیں قربان کر رہے ہیں، جبکہ دوسری طرف گورنر راج کے سائے میں بیٹھی اشرافیہ اپنی تفریح اور مغربی طرز کی محفلوں میں مگن ہے۔
عوامی حلقوں نے مطالبہ کیا ہے کہ اس واقعے کی اخلاقی ذمہ داری قبول کرتے ہوئے شہداء کے لواحقین سے معافی مانگی جائے اور سرکاری عمارتوں کو قومی سوگ کے ایام میں تفریحی سرگرمیوں کے لیے استعمال کرنے پر مستقل پابندی عائد کی جائے۔