شعور نیوز( ویب ڈیسک):گوگل ٹرینڈز 20 جنوری 2026 کے تازہ اعداد و شمار کے مطابق پاکستان میں گزشتہ 24 گھنٹوں ہی نہیں بلکہ گذشتہ 7 دن کے دوران انٹرنیٹ پر سب سے زیادہ تلاش کی جانے والی معلومات میں آسٹریلیا ودیگر کرکٹ ٹورنامنٹ کے مقابلے ہی سرفہرست رہے، جب کہ دیگر نمایاں سرچز میں بھی کھیل کود، موبائل فونز اور تفریح سے متعلق موضوعات شامل نظر آئے ۔

یہ رجحان اس امر کی واضح نشاندہی کرتا ہے کہ ملک کی بڑی تعداد، خصوصاً نوجوان نسل، انٹرنیٹ کو کسی قسم کے سنجیدہ، تعلیمی یا تعمیری مقاصد کے بجائے غیر اہم ، لایعنی، لغو ، گناہ اور وقتی مشاغل کے لیے استعمال کر رہی ہے۔یاد رہے کہ انٹرنیٹ اور جدید ٹیکنالوجی کو متعارف کرواتے وقت یہ دعویٰ کیا گیا تھا کہ اس سے اقوام کو علم، تحقیق، تعلیم اور ترقی کی نئی راہیں میسر آئیں گی اور نوجوان نسل کو ایک مثبت سمت دی جا سکے گی۔ تاہم موجودہ رجحانات اس کے برعکس تصویر پیش کرتے ہیں۔

سرمایہ دارانہ اقدار اُس کی ٹیکنالوجی ، اُس کے آلات سے بھی پھیلتی ہیں ، کیونکہ وہ اُس کے اہداف کے مطابق بنائے جاتے ہیں۔ سرمایہ دارانہ نظام نے انسانوں کو دنیا ہی کو اول آخر سمجھنے، یہاں کی لذات کو زیادہ سے زیادہ سمیٹنے، دنیا کی زندگی کو انجوائے کرنے کا تصور دیا ہے ۔ اس کے آلات بھی اصلاً وہی کام انجام دیتے ہیں اور اُسی جانب رغبت دلاتے ہیں۔ کرکٹ اور کھیلوں کے مقابلے فی زمانہ خود سب سے بڑی سرمایہ دارانہ سرگرمی ہیں ۔

وہ حلقے جو ابتدا ہی سے اس بے لگام ٹیکنالوجی کے ممکنہ منفی اثرات کے بارے میں خبردار کر رہے تھے، آج ان کے خدشات ، امکانات و پیش گوئیاں مستقل درست ثابت ہورہی ہیں۔ عملی صورت حال یہ ہے کہ انٹرنیٹ کا بڑا حصہ لغویات، کھیل تماشے اور غیر سنجیدہ مصروفیات میں صرف ہو رہا ہے، جس کے قومی کردار سازی اور فکری ترقی پر گہرے اثرات مرتب ہو سکتے ہیں۔یہی نہیں بلکہ ذہنی بیماریوں کی نئی خطرناک لہر نے دائرہ بڑھا لیا ہے ۔ماہرین کے مطابق اگر یہی رجحان برقرار رہا تو یہ صورت حال مستقبل میں تعلیمی معیار، فکری شعور اور سماجی ترجیحات پر منفی اثر ڈال سکتی ہے، جس پر سنجیدہ غور و فکر اور اصلاحی اقدامات کی فوری ضرورت ہے۔