شعور نیوز( انٹرنیشنل ڈیسک):بھارت کی عالمی چینی پیداوار میں نمایاں حیثیت اور کولڈ ڈرنک کمپنیوں کے منافع کے پیچھے ایک ہولناک حقیقت چھپی ہے۔ لاکھوں مزدور روزانہ 14 گھنٹے تک گنے کی کٹائی کرتے ہیں، مگر بعض کو محض 400 روپے یومیہ ملتے ہیں۔ مہاراشٹر سے کرناٹک نقل مکانی کرنے والے مزدور قرض کی پیشگی رقم کے بدلے چار سے پانچ ماہ مسلسل کام کرنے پر مجبور ہیں۔ بیماری یا ماہواری کے باعث ایک دن کی چھٹی بھی بھاری کٹوتی اور جرمانے کا سبب بن جاتی ہے۔

بھارت میں گنے کی کٹائی کے لیے جدید مشینیں دستیاب ہیں۔ لیکن مہاراشٹر کے زمین دار زیادہ منافع کی خاطر کروڑوں کی مشینیں نہیں خریدتے ۔یہ سب غیر انسانی ظلم اس لیے بھی ہے کیونکہ اب جو پیداوار ہو رہی ہے وہ Mass production کے غیر انسنای، غیر فطری پیداوار کے ضمن میں آتی ہے۔ہزاروں سال سے اسی خطے کے انسان مرد خواتین کاشتکاری کرتے آرہے ہیں لیکن یہ ظالمانہ طرز پیداوار انسانوں کے بس سے باہر ہے۔

اس استحصالی نظام میں بعض خواتین مسلسل درد اور کام سے چھٹکارا پانے کی امید میں اپنی بچہ دانی نکلوانے تک کا فیصلہ کر رہی ہیں، جبکہ بعض کو غیرضروری جراحی اور طبی پیچیدگیوں کا بھی سامنا کرنا پڑا۔ 2019ء میں مہاراشٹر حکومت کی ایک کمیٹی کے سروے میں ضلع بیڈ کی 82,309 نقل مکانی کرنے والی خواتین میں سے 13,861 کی بچہ دانیاں نکالے جانے کا انکشاف ہوا؛ ان میں سے 45 فیصد سے زیادہ نے بعدازاں جسمانی یا نفسیاتی تکالیف کی اطلاع دی۔

یہ محض غربت نہیں، ایسا معاشی ڈھانچہ ہے جہاں مزدور کی صحت، عورت کا جسم اور تولیدی اختیار بھی منافع کی قیمت بن جاتے ہیں۔ سرکاری اقدامات اور عدالتی احکامات کے باوجود متاثرہ خواتین کو فلاحی سہولتیں میسر نہ ہونے کی شکایات ہیں، جبکہ عالمی مشروباتی کمپنیاں اسی زرعی سپلائی چین سے وابستہ ہیں۔ جب روزی بچانے کے لیے عورت کو اپنی کوکھ قربان کرنے کا خیال آئے تو سوال صرف مزدور کی مجبوری کا نہیں، اس نظام کی انسان دشمن ترجیحات کا بھی ہے۔