شعور نیوز( وڈیسک):این سی سی آئی اے نے رواں ہفتے کراچی کی اہم شاہراہ (شارع فیصل/پی ای سی ایچ ایس) پر واقع ایک بڑے کال سینٹر پر چھاپہ مار کر کل 273 افراد کو حراست میں لیا تھا۔ اسی کیس کی تازہ ترین سماعت کے دوران جوڈیشل مجسٹریٹ شرقی کی عدالت نے گرفتار 9 مرکزی ملزمان کے جسمانی ریمانڈ میں مزید 3 روز کی توسیع کرتے ہوئے انہیں 10 نومبر کو دوبارہ پیش کرنے کا حکم دے دیا ہے۔

سماعت کے دوران این سی سی آئی اے نے 9 اہم ملزمان کو ریمانڈ کی مدت ختم ہونے پر عدالت کے روبرو پیش کیا۔تفتیشی افسر نے عدالت سے استدعا کی کہ مقدمے کی تحقیقات تاحال جاری ہیں، ملزمان کے مزید روپوش ساتھیوں کی گرفتاری اور برآمد کی گئی ڈیجیٹل ڈیوائسز کا جامع فرانزک معائنہ کرانا باقی ہے، اس لیے ملزمان کا مزید 12 روز کا جسمانی ریمانڈ منظور کیا جائے۔

نیشنل سائبر کرائم انویسٹی گیشن ایجنسی (این سی سی آئی اے) کی جانب سے کراچی میں غیر قانونی اور غیر ملکی شہریوں کو مالیاتی فراڈ کا نشانہ بنانے والے کال سینٹرز کے خلاف وسیع پیمانے پر کریک ڈاؤن جاری ہے۔ پاکستان کے قوانین میں ایسے جرائم قابل ضمانت ہوتے ہیں اس لیےلوگ اس قسم کی ڈجیٹل حرام کاری کو محسوس ہی نہیں کرپاتے ۔ انکو یہی لگتا ہے کہ وہ ایک اچھے سے دفتر میں فون، کمپیوٹر، موبائل ، انٹرنیٹ سے منسلک ہو کر کسی کے بھی اکاؤنٹ سے کچھ بھی بول کر جو رقم نکلوالیتے ہیں وہ اُن کی کوئی محنت اور صلاحیت کی کمائی ہے۔ یہ حرام کاری مستقل معاشرت میں رچ بس جاتی ہے اور پورے معاشرے کو لپیٹ میں لے لیتی ہے۔

ملزمان کے وکلا شہاب سرکی اور جام خضر ایڈووکیٹ نے مزید جسمانی ریمانڈ کی سخت مخالفت کی۔ انہوں نے مؤقف اختیار کیا کہ تمام ضروری ڈیجیٹل آلات اور ڈیوائسز پہلے ہی برآمد کی جا چکی ہیں اور ملزمان تفتیشی عمل میں مکمل تعاون کر رہے ہیں۔ انہوں نے نشاندہی کی کہ پیکا (PECA) ایکٹ کی متعلقہ دفعات کے تحت تفتیش کے لیے مزید جسمانی ریمانڈ کی قانوناً ضرورت نہیں ہے۔وکلا نے عدالت کو بتایا کہ اس کارروائی میں گرفتار کیے گئے 264 دیگر ملزمان کی ضمانتیں پہلے ہی منظور کی جا چکی ہیں، جن میں 156 سے زائد خواتین اور کم عمر (جووینائل) ملزمان بھی شامل ہیں۔

عدالت نے فریقین کے دلائل سننے کے بعد 9 ملزمان کو مزید 3 روز کے جسمانی ریمانڈ پر این سی سی آئی اے کے حوالے کر دیا اور ہدایت کی کہ انہیں 10 نومبر کو دوبارہ پیش کیا جائے۔ فاضل عدالت نے ریمارکس دیے کہ آئندہ سماعت پر ان ملزمان کی درخواستِ ضمانت پر بھی فیصلہ سنایا جائے گا۔

ایجنسی کے مطابق یہ کال سینٹر کلاؤڈ بیسڈ ڈائلرز اور اسپورفڈ کالز کے ذریعے بیرون ملک (خاص طور پر امریکہ اور دیگر ممالک) کے شہریوں سے مالیاتی فراڈ، کریڈٹ کارڈ ڈیٹا کی چوری اور دھوکہ دہی میں ملوث تھا۔این سی سی آئی اے نے چھاپے کے دوران 3,000 سے زائد لیپ ٹاپس، سینکڑوں موبائل فونز اور دیگر الیکٹرانک آلات اپنے قبضے میں لیے تھے۔

گرفتار ملزمان کی غیر معمولی تعداد کے باعث سندھ ہوم ڈیپارٹمنٹ نے کال سینٹر کی عمارت کو عارضی طور پر سب جیل قرار دیا تھا جہاں سے ویڈیو لنک کے ذریعے ملزمان کو عدالت کے سامنے پیش کیا گیا۔ عدالت نے مقدمے میں نامزد خواتین اور کم عمر لڑکوں اور دیگر ملازمین کو 20,000 روپے کے مچلکوں کے عوض ضمانت پر رہا کرنے کا حکم دیا تھا۔این سی سی آئی اے کے حکام کے مطابق کراچی میں اس نوعیت کے غیر قانونی اسکیمنگ کال سینٹرز کے خلاف انٹیلی جنس بیسڈ آپریشنز کا دائرہ کار مزید وسیع کیا جا رہا ہے۔