شعور نیوز(ویب ڈیسک):پاکستان اور آزاد جموں و کشمیر سمیت ملک بھر میں 27 اکتوبر کو یومِ سیاہ کشمیر منایا جا تاہے، جس کا مقصد مقبوضہ کشمیر پر بھارتی قبضے کے خلاف احتجاج اور کشمیری عوام کے ساتھ یکجہتی کا اظہار کرنا ہے۔یہ اُس 27 اکتوبر 1947 کے دن سےتعلق رکھتا ہے جب بھارتی افواج سری نگر میں داخل ہوئی تھیں، جسے پاکستان اور کشمیری قیادت کشمیر پر بھارتی قبضے کے آغاز کے طور پر دیکھتی ہے۔ برصغیر کی تقسیم کے بعد ریاست جموں و کشمیر کے مستقبل اور مہاراجہ ہری سنگھ کے الحاق کا معاملہ تنازع کا باعث بنا۔ تقریباً آٹھ دہائیاں گزرنے کے باوجود مسئلہ کشمیر حل طلب ہے اور کشمیریوں کے مستقبل کا فیصلہ کرنے کے حق کا مطالبہ جاری ہے۔

اس موقع پر ملک کے مختلف شہروں میں ریلیاں نکالی جا رہی ہیں، جبکہ سیاسی قیادت نے عالمی برادری سے مطالبہ کیا ہے کہ کشمیریوں کو اقوام متحدہ کی قراردادوں کے مطابق حقِ خودارادیت دلانے کے لیے مؤثر کردار ادا کیا جائے۔

یومِ سیاہ کشمیر کے موقع پر پاک فوج کے شعبہ تعلقات عامہ (آئی ایس پی آر) کی جانب سے کشمیری عوام سے اظہارِ یکجہتی کے لیے خصوصی نغمہ بھی جاری کیا گیا ہے۔نغمے میں سید علی گیلانی، میرواعظ عمر فاروق اور برہان وانی کو جدوجہدِ آزادی کی نمایاں شخصیات کے طور پر پیش کیا گیا، جبکہ اختتام پر کشمیری عوام کی جدوجہد کی حمایت جاری رکھنے کے عزم کا اعادہ کیا گیا۔

اقوام متحدہ کی سلامتی کونسل نے 1948 سے 1971 کے دوران جموں و کشمیر کے معاملے پر متعدد قرارداد یں منظور کیں، جن میں کشمیریوں کو حقِ خودارادیت دینے اور رائے شماری کرانے کا وعدہ کیا گیا تھا، مگر 7 دہائیاں گزرنے کے باوجود ان پر عمل نہیں کرایا جا سکا۔

جدید نیشن اسٹیٹ کا ماڈل زمین اور سرحدوں کو تو مقدم رکھتا ہے لیکن اس سرحد کے اندر رہنے والی قوم کی مرضی کو کچل دیتا ہے۔ بھارت جموں و کشمیر پر اپنا حق جتانے کے لیے اپنی "علاقائی سالمیت" کا سہارا لیتا ہے، جبکہ وہاں کے عوام اس نیشن اسٹیٹ کا حصہ بننے کے بجائے اپنی الگ شناخت اور فوجی تسلط سے آزادی کا مطالبہ کرتے ہیں۔

دنیا کی سب سے بڑی جمہوریت ہونے کا دعویٰ کرنے والی ریاست، ایک خطے کو چلانے کے لیے 8لاکھ فوجیوں کی تعیناتی اور خصوصی غیر انسانی قوانین کا سہارا لیتی ہے، جو خود نیشن اسٹیٹ کے جمہوری تصور کا سب سے بڑا تضاد ہے۔آزادی کی جائز قانونی جدوجہد کے دوران اب تک ایک لاکھ سے زائد کشمیری مسلمان بھارتی سیکیورٹی فورسز کے ہاتھوں شہید ہو چکے ہیں۔

دورانِ حراست تشدد اور ماورائے عدالت قتل کی وجہ سے 7,300 سے زائد افراد جان سے ہاتھ دھو بیٹھے۔اندازاً 8,000 سے زائد کشمیری لاپتہ ہیں، جن کے بارے میں ان کے لواحقین کو کوئی معلومات فراہم نہیں کی گئیں۔بھارتی فورسز کے ہاتھوں 11,200 سے زائد خواتین جنسی زیادتی کا شکار ہوچکیں۔اس تنازع کے نتیجے میں 107,000 سے زائد بچے یتیم اور 22,900 سے زائد خواتین بیوہ ہوئیں۔