شعور نیوز( ویب ڈیسک):شہرِ قائد کے دو بڑے طبی اداروں، ڈاؤ یونیورسٹی ،اوجھا کیمپس اور میمن میڈیکل انسٹی ٹیوٹ کے درمیان ایک متنازع میوزک کنسرٹ کا انعقاد شائقینِ موسیقی کے لیے ایک تفریحی خبر ہو سکتا ہے، لیکن شدید بیمار مریضوں، ان کے تیمارداروں اور اسلامی و معاشرتی اقدار کی پاسداری کرنے والے شہریوں کے لیے یہ ایک گہرا تشویشناک واقعہ ہے۔

سوشل میڈیا پر جاری کیے گئے ایک کمرشل اشتہار کے مطابق، 28 نومبر 2026 کو ڈاؤ یونیورسٹی اوجھا کیمپس میں "کچھ ادھورا سا" کے عنوان سے ایک موسیقی کے کنسرٹ کا انعقاد کیا جا رہا ہے۔کنسرٹ مفت نہیں ہے بلکہ ٹکٹ 2,999 روپے سے 24,999 روپے تک فروخت کیے جا رہے ہیں۔

جہاں ایک طرف اسپتالوں کی فضاؤں میں تلاوتِ قرآنِ پاک، سورہ رحمن اور سورہ یاسین کی روحانی تلاوت کے ذریعے مریضوں کے شفا اور سکون کی دعائیں مانگی جاتی ہیں، وہاں اس قسم کی کمرشل تجارتی اور ہنگامہ خیز سرگرمیوں کا الیکٹرانک ساؤنڈ سسٹم کے ساتھ انعقاد کئی سنگین دینی ،اخلاقی، طبی اور قانونی سوالات کھڑے کر رہا ہے۔

مختلف طبقہ ہائے زندگی پر اس کے بھیانک اثرات یہ ہو سکتے ہیں:

1. مریضوں اور ان کے اہل خانہ پر اثرات: اسپتال ایک ایسا مقام ہے جہاں وینٹی لیٹر، آئی سی یو اور ایمرجنسی وارڈز میں زندگی اور موت کی کشمکش میں مبتلا مریض زیرِ علاج ہوتے ہیں۔ گرجدار سپیکرز، تیز موسیقی اور شور و غل ان کے اعصابی نظام پر شدید منفی اثر ڈالتا ہے۔اس سے دل کے مریضوں اور این آئی سی یو (NICU) میں موجود نوائیدہ بچوں کی صحت بگڑنے کا سنگین خطرہ لاحق ہوسکتا ہے، کیونکہ بیمار کے لیے سکون سب سے بڑی دوا بتائی جاتی ہے ۔

2. اسلامی معاشرت اور اقدار کی پامالی: پاکستانی معاشرے کی بنیاد اسلامی اصولوں اور انسانی ہمدردی پر قائم ہے۔آئین میں درج ہے کہ ریاست معاشرت کو اسلامی بنیادوں پر استوار کرے گی۔ اسپتالوں کو روایتی طور پر احترام اور خاموشی کا مرکز سمجھا جاتا ہے۔ بیماروں کے قریب فضول خرچی، بے راہ روی اور تجارتی بنیادوں پر فحش ، سیکولر یا لبرل طرزِ زندگی کے مظاہروں کو فروغ دینا دینی و اخلاقی قدروں کی صریح خلاف ورزی ہے۔

3. نوجوان نسل اور اخلاقی تنزلی: 25,000 روپے تک کے مہنگے ٹکٹس کے ذریعے نوجوانوں کو کنسرٹ، رقص اور بعد ازاں ممکنہ بے راہ روی کی طرف مائل کرنے کی یہ کوششیں ان کی تعلیمی اور اخلاقی سمت کو بگاڑ رہی ہیں۔ جہاں طلبہ کو تحیقیق، میڈیکل سائنس اور سماجی خدمت پر توجہ دینی چاہیے، وہاں انہیں اس طرح کی چکا چوند اور بے مقصد سرگرمیوں کا عادی بنایا جا رہا ہے۔

4. ڈاکٹرز اور طبی شعبے کا وقار: ڈاکٹر کا پیشہ انسانیت کی خدمت کا سب سے مقدس شعبہ ہے۔ جب طبی اداروں کے احاطے یا ان کے بالکل جوار میں ایسے ڈانس اور نائٹ کنسرٹس منعقد کیے جاتے ہیں، تو اس سے معالجین اور میڈیکل ایجوکیشن کا وقار مجروح ہوتا ہے، اور عوام میں طبی پیشے سے وابستہ افراد کا ایک غیر سنجیدہ تاثر قائم ہوتا ہے۔

سرکار کی زمین پر کمرشل سرگرمی: ایک بڑا قانونی و انتظامی سوال

سب سے اہم اور بنیادی سوال یہ ہے کہ ڈاؤ یونیورسٹی اور اس کے اوجھا کیمپس کے لیے حکومتِ سندھ نے جو رفاہی اور تعلیمی زمینیں الاٹ کی تھیں، ان کا بنیادی مقصد "عوام کے علاج معالجے اور میڈیکل تعلیم و تحقیق" کو فروغ دینا تھا۔

زمین کے استعمال کی خلاف ورزی: سرکاری و رفاہی زمین کو لاکھوں روپے کمانے کے لیے پرائیویٹ ایونٹ مینجمنٹ کمپنیوں کے حوالے کرنا اور تجارتی بنیادوں پر کنسرٹ کی اجازت دینا کس قانون کے تحت جائز ہے؟
حکومتی خاموشی: کیا متعلقہ محکموں اور ہائر ایجوکیشن کمیشن (HEC) سے اس قسم کی غیر تعلیمی، تجارتی اور تفریحی سرگرمی کے لیے کوئی پیشگی این او سی (NOC) حاصل کیا گیا ہے؟

کراچی میں کئی انسانی حقوق ،مذہبی جماعتیں، سیاسی جماعتیں اور طلبہ تنظیمیں موجود ہیں تاہم ابھی تک حکومتِ سندھ، ڈاؤ یونیورسٹی کی انتظامیہ اور محکمہ صحت سے کوئی ایسا مطالبہ یا احتجاج نظر نہیں آرہا کہ مریضوں کی صحت و اسلامی اقدار کے تحفظ پر کوئی اقدام اٹھایا جائے۔