شعورنیوز( انٹرنیشنل ڈیسک):یورپ کے متعدد ممالک کے اہم ہوائی اڈوں اور مختلف ایئرلائنز کی پروازوں کو بم سے اڑانے کی دھمکیوں نے پورے یورپ براعظم کے فضائی آپریشنز میں شدید خلل ڈال کر سرمایہ دارانہ نظام کا پہیہ روک دیا۔ برطانیہ، پولینڈ، اسپین، اٹلی اور بلغاریہ سمیت متعدد ممالک میں کم از کم 12 پروازوں کا رخ تبدیل کرنا پڑا اور متعدد طیاروں کی ایمرجنسی تلاشی لی گئی، تاہم تمام انتباہات کو مکمل تلاشی کے بعد غلط قرار دے دیا گیا۔ ایئرپورٹ ، مسافروں اورجہازوں تلاشی کے تمام عمل کے بعد متاثرہ ہوائی اڈوں پر آپریشنز بحال کر دیے گئے۔ ڈبلن اور لزبن سے روم پہنچنے والی دو پروازوں کی تلاشی کے دوران ڈبلن والے طیارے کو اطالوی فضائیہ نے لینڈنگ تک اپنے حفاظتی حصار میں رکھا۔ہفتے بھر میں دو واقعات نے پورے نظام کو ہلا کر رکھ دیا ہے۔ اب خطرہ صرف بم دھماکے کا نہیں بلکہ سائبر اٹیک کے ذریعہ سب کچھ جام کرنے کا بھی شروع ہوچکا ہے۔

ہوائی اڈوں کو بم سے اڑانے کا سلسلہ واقعاتی حقیقت ہے ۔لندن کے اِسی ہیتھرو ایئرپورٹ پر 20 اپریل 1984ء کو ٹرمینل 2 کے بیگیج ایریا میں دھماکے کے نتیجے میں 23 افراد زخمی ہوئے تھے، جبکہ مارچ 1994ء میں آئرش ریپبلکن آرمی (IRA) نے اسی ایئرپورٹ پر مسلسل تین بار حملے کیے تھے۔ اسی لیے عالمی ایوی ایشن ادارے ایسی ہر اطلاع کو انتہائی سنگینی سے لیتے ہیں۔

اس طرح کی اطلاعات سرمایہ د ارانہ نظام کو دھچکا پہنچانے کے لیے اہم ہوتی ہیں اور ایسی اطلاعات پر اربوں روپے کے حفاظتی سیکیورٹی نظام غیر معمولی پروٹوکول اختیار کرتے ہیں جس سے سرمایہ دارانہ نظام کا عارضی طور پر گھومتا پہیہ رک جاتا ہے۔تاریخی طور پر یہ ہوائی جہاز ، ریلوے یا دیگر سفری امور سرمایہ دارانہ نظام کا پہیہ چلانے میں یہ سب عالمی سپلائی چین کی رگیں کہلاتے ہیں۔ جدید معاشی تجزیہ کاراس بات کے قائل ہیں کہ سرمایہ دارانہ نظام (Capitalism) کی بقا کا انحصار صرف پیداوار پر نہیں، بلکہ مواصلات اور نقل و حمل کی رفتار پر ہے۔

اس انتہائی مربوط نظام میں ایک بھی ہوائی اڈے کی بندش یا پرواز کا رخ بدلنا ایک ڈومینو ایفیکٹ پیدا کرتا ہے۔ ایک تاجر کا بروقت میٹنگ میں نہ پہنچنا، کسی اہم کارگو کا وقت پر ڈیلیور نہ ہونا، یا بین الاقوامی کوریئر سروسز کا رک جانا پوری دنیا کے تجارتی نیٹ ورک کو وقتی طور پر مفلوج کر دیتا ہے۔ٹورازم، ایوی ایشن، ہاسپیٹلٹی اور انشورنس کے شعبے اس قسم کے سکیورٹی بحرانوں سے براہِ راست متاثر ہوتے ہیں۔ایک ہی دن میں درجنوں پروازیں منسوخ ہونے سے ان کمپنیوں کے حصص (Shares) کی قیمتیں گر جاتی ہیں، انشورنس کے دعوے بڑھ جاتے ہیں، اور سرمایہ کاروں میں غیر یقینی کی لہر دوڑ جاتی ہے۔