شعور نیوز( ویب ڈیسک): پاکستان کے مرکزی تجارتی شہر کراچی کے شاپنگ سینٹر گل پلازہ میں 17 جنوری 2026 کی شب دس بجے ایک معمولی آگ دیکھتے ہی دیکھتے پوری عمارت میں پھیل گئی۔عمارت کے اوقات کار مکمل ہو چکے تھے تاہم ہفتہ کی شب کی وجہ سے سیکڑوں لوگ اُس وقت بھی عمارت میں موجود تھے۔

ایم اے جناح روڈ پر واقع اس گل پلازہ شاپنگ سینٹر کی آگ پر 33 گھنٹے بعد قابو پالیا گیا۔متاثرہ عمارت کے کئی حصے گر چکے ہیں۔ تمام لوگ گواہ ہیں کہ لاشوں اورسیکڑوں دکانوں کے مکمل جل جانے کے باوجود پہلی منزل پر واقع مسجد اور اس میں موجود قرآن مجید مکمل محفوظ رہے۔

20 جنوری تک دم گھٹنے اور جھلس کر جاں بحق افراد کی تعداد 26 ہوچکی ہے۔ اَب تک 76افرادلاپتہ ہیں۔ ملبہ ہٹانے اور لاشیں نکالنے کا سلسلہ جاری ہے۔پہلی منزل کی تلاش مکمل ‘متعدد لاشیں ناقابل شناخت ہو چکیں جبکہ مختلف مقامات سے انسانی اعضاءبھی برآمد ہو رہے ہیں۔ تین منزلہ یہ شاپنگ سینٹر 40 سال قبل تعمیرہواتھا ۔شہر کی دیگر عمارتوں کی طرح یہاں بھی نقشے سے ہٹ کر تعمیرات اور دکانیں مقررہ تعداد سے کہیں زیادہ تھیں۔ دیگر اداروں کی طرح یہاں بھی بلڈنگ انتظامیہ عمارت کے انتظامی و تحفظ کے معاملات پر پیسے جمع کرکے کوئی کام نہیں کرتی تھی۔سرکاری اداروں کی کرپشن کوئی ایسا عمل نہیں جسے نظر انداز کردیا جائے ،اصلاً وہی مسئلے کی جڑ ہے۔

واقعے کے ساتھ ہی شہر میں غلیظ سیاسی کھیل شروع ہوگیا۔ 2022 سے 2024 کے درمیان ہی مختلف میڈیا چینلز نے صرف کراچی میں 3 ہزار آگ لگنے کے چھوٹے بڑے واقعات رپورٹ کیے ہیں۔ پورے ملک میں سندھ اور کراچی ناجائز تعمیرات اور کرپشن نمایاں مقام رکھتے ہیں، کیونکہ ایسی ناجائز اور غیر محفوظ تعمیرات کا معاملہ ملک کے دیگر مرکزی شہروں میں نہیں نظر آتا۔جتنی بھی سیاسی یا مذہبی جماعتیں اس معاملے پر عجیب سفاک قسم کی آوازیں اٹھا رہی ہیں ، اُن سب کے ہاتھ ،اُن ے کارکنان و ذمہ داران کے ہاتھ شہر میں ناجائز تعمیرات، غیر محفوظ تعمیرات ، تجاوزات ، قوائد کے برخلاف تعمیرات میں ڈوبے ہوئے ہیں۔مگر اپنی سیاست چمکانے کے لیے سب ایک دوسرے پر لا یعنی اعتراضات کر رہے ہیں ۔

حکومت سندھ کا دفاعی موقف ہے کہ آگ لگتی رہتی ہے۔ وزیر اعلیٰ وغیرہ کے پہنچنے سے اہم ہے امدادی ٹیموں کا پہنچنا ۔باقی تحقیقات وغیرہ جاری رہیں گی۔

اصل بات یہ ہے کہ اگر آپ مغرب کی نقالی کر رہے ہیں اور مغرب کے قوائد کے مطابق عمارت نہیں بنائیں گے تو نتائج کبھی بھی ، کسی بھی وقت ، کسی بھی شکل میں آئیں گے۔ ہمیں بھی دکھ ہے، افسوس ہے، مسلمان بھائیو کی جانیں ایسے چلی گئیں۔ اس لیے ہم بار بار سمجھاتے ہیں کہ جدید سرمایہ دارانہ اقدار نیوٹرل نہیں ہوتیں چاہے شاپنگ سینٹر ہی کیوں نہ ہو۔ قتل کرنا، جان لینا، ایمان چھیننا اُن کا لازمی حصہ ہوتا ہے۔