شعورنیوز(ویب ڈیسک):بدترین مسائل کے درمیان عالمی لبرل فیمنسٹ ایجنڈے کے ہرکارے پاکستان میں مستقل فعال اور فوکس ہو کر اپنے ایجنڈے پر گامزن نظر آتے ہیں ۔خیبرپختونخوا میں لڑکیوں کی شادی کی کم از کم قانونی عمر 16 سے بڑھا کر 18 سال کرنے کے لیے پشاور ہائیکورٹ میں آئینی درخواست دائر کردی گئی ہے۔ دو خواتین لینا قمر اور ماہم نفیس کی جانب سے کورٹ میں یہ متنازعہ درخواست دائر کی گئی ہے۔مقدمے میں وفاقی و صوبائی حکومتوں، سیکرٹری قانون اور دیگر متعلقہ حکام کو فریق بنایا گیا ہے۔

درخواست گزاروں نے مؤقف اختیار کیا ہے کہ اسلام آباد، سندھ، پنجاب اور بلوچستان میں لڑکیوں کی شادی کی کم از کم عمر 18 سال مقرر کی جا چکی ہے، جبکہ خیبرپختونخوا میں یہ حد اب بھی 16 سال ہے۔ انہوں نے عدالت سے متعلقہ حکام کو ضروری قانون سازی کی ہدایت دینے کی استدعا کی ہے۔

پاکستان میں مہنگائی، بد امنی،لوٹ مار، قتل عام، کرپشن، بے روزگاری، غربت، صحت و تعلیم کے مسائل اپنی جگہ نمایاں ہیں لیکن عالمی لبرل ایجنڈے پر کام کرنے والے شادی کی عمر بڑھوانے کے لیے مستعد و بےقرار ہیں ۔ ایک ایسے صوبے میں جہاں ڈیموکریٹک اصولوں کے برخلاف گورنر راج و ایمرجنسی نافذ ہو وہاں یہ معاملہ کورٹ لیکر جانا معمول کی بات نہیں ہو سکتی۔

مقدمہ کرنے والی ان دو خواتین کا پس منظر کس این جی او سے ہے وہ ابھی تک سامنے نہیں آیا لیکن لڑکیوں کی شادی کی عمر کو 18 سال کرانے کی خواہشات جن فیمنسٹ تنظیموں کو ہے ،ظاہر ہے کہ وہی اس سطح تک جا سکتی ہیں۔یہ پیش رفت ایسے وقت میں ہوئی ہے جب شادی کی عمر سے متعلق پاکستانی قانون سازی بین الاقوامی ہیومن رائٹس کے فورمز پر بھی زیرِ بحث ہے۔اقوام متحدہ کی ایک کمیٹی کے حالیہ اجلاس میں پاکستانی نمائندے نے چاروں متعلقہ علاقوں میں 18 سال کی حد مقرر کرنے کا ذکر کیا۔ تاہم بین الاقوامی سطح پر اس قانون سازی کی پذیرائی، بذاتِ خود کسی خفیہ منصوبہ بندی یا اس درخواست کی بیرونی سرپرستی کا ثبوت نہیں۔اس معاملے کا بنیادی سوال یہ ہے کہ خاندانی زندگی سے متعلق قانون صوبے میں گورنر راج کے دوران کیوں بننا چاہیے؟

دوسری جانب درخواست گزاروں نے کم عمری کی شادی کے باعث لڑکیوں کی صحت، تعلیم اور خاندانی زندگی پر پڑنے والے اثرات کو قانونی تبدیلی کی بنیاد بنایا ہے۔ پاکستان میں صوبہ خیبر پختونخوا کا شمار اُن خطوں میں ہوتا ہے جہاں والدین خود اپنی بیٹی کی شادی کی عمر کا تعین کرتے ہیں ، جہاں والدین خود اپنے بچوں کی صحت و غذا کا خیال رکھتے ہیں۔

شاید آپ جانتے نہ ہوں کہ امریکہ میں آج بہت سی ریاستوں میں اب بھی کم عمری کی شادی قانونی استثناؤں سے ممکن ہے۔ کیلیفورنیا، مسیسپی، نیو میکسیکو اور اوکلاہوما میں والدین یا عدالت کی اجازت کے ساتھ کوئی مطلق کم از کم شادی کی عمر مقرر نہیں ہے، جبکہ 34 صوبوں میں قانونی استثنیٰ موجود ہے۔