شعور نیوز( انٹرنیشنل ڈیسک):جرمنی کی تاریخ میں نوجوانوں نے سرمایہ دارانہ نظام کی اندھی ہوس، معاشی ناانصافی اور ریاستی جبر کے خلاف ایک ایسی احتجاجی تحریک کا آغاز کر دیا ہے جس نے یورپ کے سب سے بڑے معاشی مرکز کے ایوانوں کو ہلا کر رکھ دیا ہے۔ جرمنی کے 34 شہروں میں ایک لاکھ سے زائد نوجوانوں نے سڑکوں پر نکل کر نہ صرف نظام کے خلاف اپنے غصے کا اظہار کیا ہے ، بلکہ دارالحکومت برلن، فرینکفرٹ اور کولون سمیت کئی شہروں میں یہ احتجاج شدید ترین عوامی ردِعمل اور تصادم میں تبدیل ہو گیا۔

اہم بات یہ ہے کہ اس وقت یورپ کے کئی ممالک جن میں فرانس، اٹلی اور اسپین شامل ہیں وہاں بھی اس ظالمانہ غیر فطری نظام سے پیداشدہ بحران پر سخت رد عمل جاری ہے۔اس لیے یہ مظاہرے محض وقتی اشتعال کا نتیجہ نہیں، بلکہ سرمایہ دارانہ نظام کی ان پالیسیوں پر ایک زبردست اور کاری ضرب ہیں جس نے امیر کو امیر تر اور غریب کو غریب تر بنا دیا ہے۔ مہم جو گروپ "Gen Z regelt" (جنریشن زی کی حکمرانی) کے بینر تلے جمع ہونے والے ان لاکھوں نوجوانوں کا ماننا ہے کہ موجودہ سرمایہ دارانہ ڈھانچہ ان کے مستقبل کو دیمک کی طرح چاٹ رہا ہے۔

مظاہرین نے سرمایہ دارانہ نظام پر سخت تنقید کرتے ہوئے ان حقائق کو اجاگر کیا:

معاشی ناہمواری اور مہنگائی: کارپوریٹ منافع خوری اور اشرافیہ کو نوازنے کی پالیسیوں کی وجہ سے عام نوجوان کے لیے رہائش، خوراک اور بنیادی ضرورتیں پہنچ سے باہر ہو چکی ہیں۔

عوامی شعبوں کی تباہی: تعلیم اور صحت جیسے بنیادی انسانی حقوق کو بھی منافع بخش کاروبار بنا دیا گیا ہے، جبکہ نوجوانوں کے لیے اسکولوں اور ہسپتالوں کے فنڈز کاٹ کر جنگی مقاصد اور فوجی بھرتیوں کی تیاری کی جا رہی ہے۔

جرمنی میں گزشتہ کئی ماہ سے فلسطین کے حامی پرامن مظاہرین، طلبہ اور انسانی حقوق کے کارکنوں پر جرمن حکومت اور پولیس کا وحشیانہ کریک ڈاؤن مسلسل جاری تھا۔

اظہارِ رائے کی آزادی کے جھوٹے مغربی دعووں کا پردہ چاک کرتے ہوئے، جب بھی نوجوانوں نے غزہ پر جاری جارحیت کے خلاف آواز اٹھائی، تو جرمن ریاست نے ان پر لاٹھی چارج کیا، گرفتاریاں کیں اور تعلیمی اداروں میں ان کے داخلے بند کیے۔ انسانی حقوق پر یقین رکھنے والی اس نوجوان نسل کے دلوں میں جرمن حکومت کی اس دوغلی پالیسی اور بے حسی کے خلاف ایک طویل عرصے سے 'لاوا پک رہا تھا'۔ فلسطین کے حامیوں کی منظم آواز کو طاقت کے زور پر دبانے کی حکومتی کوششوں نے بارود کے ڈھیر پر چنگاری کا کام کیا، اور یہ غصہ بالآخر سرمایہ دارانہ اور فاشسٹ پالیسیوں کے خلاف ایک بڑے دھماکے کی صورت میں پھٹ پڑا۔

ہمیشہ کی طرح، سرمایہ دارانہ نظام کا محافظ میڈیا اب اس تحریک کو 'شرپسندی' اور 'انارکی' کا نام دے کر اصل حقائق کو چھپانے کی کوشش کر رہا ہے۔ جرمن وزیرِ داخلہ اور دیگر حکام مظاہرین کو انتہا پسند قرار دے رہے ہیں، جبکہ تحریک کے منتظمین کا کہنا ہے کہ ان کا مقصد صرف ایک پرامن اور منصفانہ معاشرے کا قیام تھا جہاں انسان کو سرمایہ داری کی بھٹی میں نہ جھونکا جائے۔

تجزیہ کاروں کے مطابق، جب تک جرمن حکومت فلسطین جیسے انسانی حقوق کے مسائل پر منافقت اور اپنے شہریوں پر معاشی و سیاسی جبر بند نہیں کرتی، یہ لاوا اسی طرح ابلتا رہے گا۔
شرمناک بات یہ ہے کہ پاکستان سمیت تیسری دنیا کے تمام ممالک اس بدترین نظام کے پیچھے دوڑ رہے ہیں جس کا انجام ایسا نکلتا ہے۔