شعورنیوز( انٹرنیشنل ڈیسک):امریکا میں 3 نومبر 2026کو ہونے والے وسط مدتی انتخابات کے سلسلے میں جوئے اور سٹے بازی عروج پر چلی گئی ۔ پیش گوئیوں کی ویب سائٹ پولی مارکیٹ پر امریکی عوام انتخابی نتائج پر پیسہ لگا رہے ہیں۔ایک رپورٹ کے مطابق وسط مدتی انتخابات پر کالشی اور پولی مارکیٹ پر مجموعی شرطیں 22 کروڑ ڈالر سے بڑھ چکی ہیں، جو 2024 کے مقابلے میں دگنی سے زیادہ ہیں۔ یہ رپورٹ جوئے کی صنعت پر نظر رکھنے والی ویب سائٹ کی ہے اور اکتوبر کی ہے۔ آخری ہفتے میں اصل رقم اس سے زیادہ ہو سکتی ہے۔

جوئے کی اس مارکیٹ میں ایوانِ نمائندگان کے انتخابات میں ڈیموکریٹس کی جیت کا امکان 93 فیصد اور سینیٹ میں 67 فیصد دکھایا جا رہا ہے۔

ظاہر ہے کہ امریکہ اس وقت دنیا میں کئی جنگیں، عالمی تجارت کو چھیڑے ہوئے ہے اور ٹرمپ کی پالیسیاں امریکہ کے حق میں جارحانہ واقع ہوئی ہیں، اس کے داخلی وخارجی گہرے اثرات ہیں ، اس لیے ان انتخابات پر سب کی نظریں ہیں۔

جوئے کی ویب سائٹ پر جاری ہونے والے اعداد و شمار نتائج نہیں، صرف لگائی گئی رقم کی عکاسی ہیں۔ فی الحال ایوانِ نمائندگان اور سینیٹ دونوں میں ری پبلکنز کو اکثریت حاصل ہے، سینیٹ میں ان کے 53 ارکان ہیں۔ ڈیموکریٹس جیت جائیں تو وہ ٹرمپ انتظامیہ کی تحقیقات کر سکیں گے، قانون سازی اور تقرریاں روک سکیں گے اور مواخذے کی کارروائی بھی شروع کر سکیں گے تاہم صدر کے پاس ویٹو کا اختیار ہے اور عہدے سے ہٹانے کے لیے سینیٹ میں دو تہائی اکثریت چاہیے۔

سرمایہ دارانہ ریاست میں جب ہر چیز قابل فروخت ہو سکتی ہے تو انتخابی عمل جیسا بنیادی سیاسی فیصلہ بھی منافع کمانے کی منڈی بن جاتا ہے ۔جب عوامی رائے مال خرچ کرکے خریدی و تبدیل کی جا سکتی ہے تو اقتدار کی تبدیلی کو بھی، خرید و فروخت کی جنس بنا یا جا سکتا ہے ۔ یوں اس غیر فطری شیطانی نظام کی اخلاقی کھوکھلاہٹ ظاہر ہوجاتی ہے۔ ان کے خیال میں مہنگائی، مہنگے مکان اور صحت کے اخراجات سے پریشان عام آدمی قطار میں کھڑا ہے جبکہ سرمایہ کار اس کے ووٹ پر داؤ لگا رہے ہیں۔ یہی ناقدین اسے مالیاتی سٹہ بازی کے رجحان کا حصہ قرار دیتے ہیں، جو ان کے بقول بڑھتی ہوئی عدم مساوات اور عالمی معاشی بحران کے خطرے کی طرف اشارہ کرتا ہے۔

کانگریس کا بنیادی کام قانون سازی، وفاقی بجٹ کی منظوری، حکومتی اداروں کی نگرانی اور انتظامیہ کے اختیارات پر آئینی حدود کے اندر نظر رکھنا ہے۔ اس لیے صدر کی جماعت اگر کانگریس کے دونوں ایوانوں میں اکثریت رکھتی ہو تو اسے اپنی قانون سازی اور حکومتی ترجیحات آگے بڑھانے میں نسبتاً آسانی ہوتی ہے۔اس کے برعکس اگر مخالف جماعت کسی ایک یا دونوں ایوانوں کا کنٹرول حاصل کر لے تو انتظامیہ کے لیے سیاسی اور پارلیمانی مشکلات بڑھ سکتی ہیں۔

ابھی تک زیادہ تر لوگوں نے ڈیموکریٹس کی جیت پر سٹہ لگایا ہے، یہ انتخابی نتائج آئندہ دو برس تک وائٹ ہاؤس اور امریکی کانگریس کے درمیان طاقت کے توازن کا تعین کریں گے۔اس کا مطلب یہ نہیں ہوگا کہ صدر کے تمام اختیارات ختم ہو جائیں گے یا ان کی پالیسیاں خودبخود تبدیل ہو جائیں گی۔امریکی کانگریس کے دو ایوان ہیں۔ ایوانِ نمائندگان میں نشستوں کی تعداد ریاستوں کی آبادی کے مطابق طے ہوتی ہے، جبکہ سینیٹ میں ہر ریاست کو آبادی سے قطع نظر دو نمائندے ملتے ہیں۔

نیویارک کی اٹارنی جنرل جیمز کے مطابق "کسی اور نام سے بھی جوا، جوا ہی رہتا ہے۔" ایریزونا کی اٹارنی جنرل نے کالشی پر غیر قانونی جوئے کا کاروبار چلانے اور انتخابات پر شرطوں میں سہولت کاری کا الزام لگا کر فوجداری مقدمہ اپریل 2026میں دائر کیا تھا۔ اس کے بعد ایک وفاقی عدالت نے ریاستی کارروائی روک دی۔ وفاقی حکومت نے بھی تین ریاستوں پر مقدمہ کیا جو ان پلیٹ فارمز پر زیادہ کنٹرول چاہتی تھیں۔

پیش گوئی مارکیٹوں کے حامی کہتے ہیں کہ یہ بکھری ہوئی معلومات کو یکجا کر کے رجحانات کی نشاندہی کا ایک ذریعہ ہیں۔ ان کے مطابق یہ رائے شماریوں کے ساتھ مل کر اندازہ لگانے میں مدد دیتی ہیں اور ان کی مقبولیت کو کسی نظام کے بکھرنے کا ثبوت نہیں سمجھا جا سکتا۔ خود رپورٹ بھی واضح کرتی ہے کہ یہ توقعات ہیں، مستند سروے یا نتائج نہیں۔ فیصلہ بالآخر 3 نومبر کو ووٹرز ہی کریں گے۔تاہم اس عمل پر ڈھیر سارا پیسہ لگانے ،کمانے اور لوٹنے کے عمل کا دفاع کرنے کے لیے ان کے پاس کوئی جواز نہیں ہوتا۔