شعور نیوز( انٹرنیشنل ڈیسک):فرانس میں مہنگائی، اجرتوں اور عوامی خدمات سے متعلق بڑھتی ہوئی بے چینی کے دوران حکومت کے خلاف ہونے والے احتجاج کے دوران ہونے والی توڑ پھوڑ کے مالی نقصانات وصول کرنے کے لیے ایک متنازع قانون سازی کرلی ہے ۔

17 اکتوبر کو مہنگائی اور سماجی مسائل کے خلاف احتجاج کے دوران فرانس کے مختلف شہروں میں لوٹ مار، آتش زنی اور توڑ پھوڑ کے واقعات پیش آئے۔ حکام کے مطابق، ہزاروں دکانوں کو نقصان پہنچایا گیا یا انہیں لوٹا گیا، جبکہ ہفتے کے اختتام پر پولیس نے تقریباً 2,400 افراد کو گرفتار کرلیا ہے۔ مجموعی نقصان ایک ارب یورو سے زیادہ ہونے کا تخمینہ لگایا گیا ہے۔ شہر لیموج میں 19ویں صدی کی تاریخی بلدیاتی عمارت بھی آگ سے بری طرح متاثر ہوئی۔

فرانسیسی سینیٹ میں 229 ووٹ اس متنا زع بل کے لیے ملے جبکہ 105 ووٹ مخالفت میں تھے۔احتجاج میں تشدد کے مرتکب افراد کے ساتھ بعض حالات میں دوسرے شرکا کو بھی 10 ہزار یورو تک ہرجانے کا سامنا ہوسکتا ہے۔ رہائشی امداد، بچوں کے الاؤنس اور کم آمدنی والے خاندانوں کی مالی معاونت سے رقم کاٹنے کی تجویز پر انسانی حقوق کے حلقوں نے شدید تحفظات ظاہر کیے ہیں۔

فرانس کے حالیہ واقعات سرمایہ دارانہ لبرل نظام کے ایک بنیادی تضاد کو نمایاں کرتے ہیں۔ معاشی ترقی اور شہری آزادیوں کے دعووں کے باوجود جب مہنگائی، اجرتوں اور عوامی خدمات سے متعلق شکایات شدت اختیار کرتی ہیں تو ریاست کے سامنے یہ امتحان آتا ہے کہ وہ عوامی مسائل حل کرتی ہے یا احتجاج کے اخراجات اور قانونی خطرات بڑھا دیتی ہے۔

فرانسیسی سینیٹ نے ، جس کے تحت بعض حالات میں پرتشدد ہجوم کا حصہ بننے والے افراد سے دوسروں کے کیے گئے نقصانات کا ہرجانہ بھی وصول کیا جاسکے گا۔ بل اب قومی اسمبلی میں زیرِ غور ہے اور اسے ابھی حتمی منظوری ملنا باقی ہے۔

قانون کے تحت، اگر کوئی شخص جانتے بوجھتے ایسے گروہ میں شامل ہو جو تشدد یا توڑ پھوڑ کی تیاری کر رہا ہو، تو اسے دوسروں کے کیے گئے نقصانات کا بھی مالی ذمہ دار قرار دیا جاسکتا ہے۔ اسی طرح، پولیس کی جانب سے پرتشدد اجتماع منتشر کرنے کے حکم کے باوجود وہاں موجود رہنے والے بعض افراد پر بعد میں ہونے والے نقصانات کی ذمہ داری عائد ہوسکتی ہے۔

مجوزہ بل میں فی شخص 10 ہزار یورو تک ہرجانے کی گنجائش ہے۔ مزید یہ کہ عدالتی فیصلہ حتمی ہونے کے بعد رقم کی وصولی کے لیے خاندانوں کو دی جانے والی رہائشی امداد، بچوں کے الاؤنس اور کم آمدنی والے افراد کی مالی معاونت سے کٹوتی بھی کی جاسکے گی۔ اسکول کے نئے سال کے آغاز پر بچوں کے تعلیمی اخراجات کے لیے دی جانے والی امداد بھی اس دائرے میں شامل کی گئی ہے۔

فرانسیسی سینیٹ میں کمیونسٹ سینیٹر فابیان گے نے مثال دی کہ اگر کسی خاندان سے ماہانہ 57 یورو کاٹے جائیں تو 10 ہزار یورو کا ہرجانہ ادا کرنے میں تقریباً 15 سال لگ سکتے ہیں۔ مجوزہ قانون میں بنیادی اخراجاتِ زندگی کے لیے کم از کم رقم محفوظ رکھنے کی گنجائش بھی موجود ہے۔

سرمایہ دارانہ لبرل نظام کا تضاد: معاشی دباؤ کے خلاف آواز اٹھائیں تو معاشی تحفظ بھی خطرے میں

اس بحران کا سب سے اہم پہلو یہ ہے کہ احتجاج کی حالیہ لہر کا تعلق مہنگائی، اجرتوں ، تعلیمی اداروں اور عوامی خدمات سے متعلق شکایات سے ہے۔سرمایہ دارانہ لبرل نظام اپنی کامیابی کو معاشی آزادی، انفرادی حقوق اور جمہوری شرکت سے جوڑتا ہے۔ لیکن اس نظام کے اندر ایک سنگین تضاد اس وقت سامنے آتا ہے جب شہریوں کی معاشی مشکلات بڑھیں، ان کی شکایات اجتماعی احتجاج کی صورت اختیار کریں اور پھر اسی احتجاج کے نتیجے میں ایسے قوانین متعارف ہوں جو شہریوں کے لیے اپنی آواز بلند کرنے کی معاشی قیمت بھی بڑھا دیں۔

یعنی پہلے معاشی نظام کے پیدا کردہ دباؤ سے عوام پریشان ہوں، پھر احتجاج کے دوران ہونے والی توڑ پھوڑ کی آڑ میں ان کی سماجی اور معاشی مشکلات مزید بڑھنے کا خطرہ پیدا ہوجائے۔

یہاں سوال صرف یہ نہیں کہ توڑ پھوڑ کرنے والوں کو سزا ملنی چاہیے یا نہیں۔ دکانیں جلانا، املاک تباہ کرنا اور بے گناہ شہریوں کو نقصان پہنچانا قابلِ مذمت ہے، اور متاثرہ دکانداروں کو معاوضہ ملنا چاہیے۔ اصل سوال یہ ہے کہ ذمہ داری کا تعین کس بنیاد پر ہوگا، اور کیا ریاست ایسے لوگوں سے بھی دوسروں کے نقصانات وصول کرسکتی ہے جنہوں نے خود کسی چیز کو نقصان نہیں پہنچایا؟

اگر کسی شخص کو محض کسی پرتشدد ہجوم میں موجودگی کی بنیاد پر دوسروں کے کیے کی قیمت ادا کرنا پڑے تو یہ انفرادی ذمہ داری اور اجتماعی سزا کے درمیان ایک خطرناک لکیر دھندلا سکتا ہے۔

انسانی حقوق کے دعوے اور غریب خاندانوں پر نئی ضرب

ایمنسٹی انٹرنیشنل فرانس نے خبردار کیا ہے کہ رہائشی امداد اور دیگر سماجی فوائد سے رقم کاٹنے کے نتیجے میں پہلے ہی معاشی مشکلات کا شکار خاندان مزید غربت میں دھکیلے جاسکتے ہیں۔ انسانی حقوق کے حلقوں کو یہ خدشہ بھی ہے کہ قانون کا وسیع اطلاق پُرامن احتجاج کرنے والوں کو خوف زدہ کرسکتا ہے۔

حکومت کا مؤقف ہے کہ توڑ پھوڑ کے متاثرین کو معاوضہ ملنا چاہیے اور نقصان کا بوجھ صرف ٹیکس دہندگان پر نہیں ڈالا جانا چاہیے۔ اس مؤقف میں متاثرین کے حقوق کا ایک جائز پہلو موجود ہے، لیکن سوال یہ ہے کہ کیا معاوضے کی وصولی کے لیے بچوں کی ضروریات، رہائش اور کم آمدنی والے خاندانوں کے بنیادی اخراجات کو خطرے میں ڈالنا منصفانہ حل ہے؟

یہی وہ مقام ہے جہاں اس قسم کی لبرل فلاحی ریاست کے دعووں کا امتحان ہوتا ہے۔ اگر ریاست سماجی امداد کو کمزور طبقوں کے تحفظ کا ذریعہ قرار دیتی ہے تو اسے یہ بھی واضح کرنا ہوگا کہ اسی امداد کو جرمانے وصول کرنے کے لیے استعمال کرنے سے انتہائی ضرورت مند خاندانوں پر کیا اثر پڑے گا۔

فرانس اکیلا نہیں؛ اٹلی اور اسپین میں بھی سخت اقدامات

مغربی یورپ کے دیگر ممالک میں بھی احتجاج، لوٹ مار اور سوشل میڈیا کے ذریعے پرتشدد سرگرمیوں کی تنظیم کے خلاف سخت اقدامات سامنے آرہے ہیں۔اٹلی میں نابالغ بچوں کی جانب سے توڑ پھوڑ کے بعض واقعات پر والدین کو ایک ہزار یورو تک جرمانے اور نقصانات کے معاوضے کا سامنا ہوسکتا ہے، جبکہ آن لائن پرتشدد احتجاج منظم کرنے کے لیے چار سے 12 سال تک قید کی سزاؤں کی گنجائش بھی متعارف کرائی گئی ہے۔

اسپین میں 24 اکتوبر کو بارسلونا میں طلبہ کے احتجاج سے منسلک بعض گروہوں کی جانب سے دکانوں کو لوٹنے اور املاک کو نقصان پہنچانے کے واقعات رپورٹ ہوئے۔ ہالووین کے موقع پر 31 اکتوبر کے لیے یورپ کے کم از کم نو ممالک کے 46 شہروں میں احتجاج کی اپیلوں کی بھی نشاندہی کی گئی ہے۔ تاہم ان اپیلوں میں پُرامن احتجاج اور لوٹ مار کی ترغیب دینے والے پیغامات کو ایک ہی چیز نہیں سمجھا جاسکتا۔

فرانسیسی وزیر داخلہ لوراں نونیز نے 31 اکتوبر کے لیے ملک بھر میں 70 ہزار سکیورٹی اہلکار تعینات کرنے کا اعلان کیا ہے۔ دوسری جانب مزدور تنظیموں اور طلبہ نے مہنگائی، اجرتوں اور عوامی خدمات کے مسائل پر احتجاج جاری رکھنے اور 5 نومبر کو ملک گیر ہڑتال کی اپیل کی ہے۔