شعور نیوز( ویب ڈیسک):پاکستان کے حکمرانوں کی طرف سے بہترین معیشت، بہترین معاشی پالیسیوں کے دعوؤں، وعدوں کے باوجود ملک بھر میں آ ٹا مزید مہنگا ہوکر 150 روپے تک پہنچ گیا۔ زرعی ملک ہونے کے باوجود پاکستان میں آٹے کی قیمتوں میں جس قسم کا اُتار کم اور چڑھاؤ زیادہ جاری ہے وہ عوام کے لیے پیٹ کی فکر اول و آخر بنا رہا ہے ۔ غلیظ سرمایہ دارانہ سودی نظام کا بنیادی ہدف اور ایجنڈا دراصل تمام انسانوں کو مستقل حصول سرمایہ کی تگ و دو میں لگانا ہوتا ہے۔ یوں مستقل مہنگائی بڑھتی رہتی ہے ، اگر اتفاق سے اقتدار میں کرپٹ حکمران آجائیں تو پھر یہ مزید تیزی سے بڑھتی ہے۔

ایک اور المیہ یہ بھی ہے کہ پاکستان میں آٹا اور گندم ’مافیا ‘کے عنوان سے بھی جانا جاتا ہے۔ حکمران بھی اپنا حصہ لیکر یا اس میں شامل ہو کر اس گروہ کے سامنے کبھی ’چوں ‘بھی نہیں کر پاتے، یہی وجہ ہے کہ جنوری 2026 میں 20 کلو وزن کے گندم کے آٹے کا تھیلا 3 ہزار روپے تک پہنچ گیا ۔

اب ملک بھر میں تیزی سے روٹی کی قیمت 25 روپے تک پہنچ گئی ہے۔پاکستان کے موقر نشریاتی ادارے نے و فاقی ادارہ شماریات کی رپورٹ سے آٹے کی قیمتوں کی تفصیلات پیش کی ہیں۔ رپورٹ کے مطابق پشاور اوربنوں میں آٹے کے 20 کلو تھیلے کی قیمت 3 ہزار روپے تک ہے۔اسلام آباد میں آٹے کا 20 کلو کا تھیلا 2960 روپے ، راولپنڈی میں 2933 ،کوئٹہ2850 اورحیدر آباد میں آٹے کا 20 کلو کا تھیلا2760روپے تک میں فروخت ہو ر ہا ہے۔ کراچی 2700روپے اورسرگودھا میں آٹے کا20کلوکاتھیلا2667 روپے تک ہوگیا۔ فیصل آباد،خضدار،سکھر اورملتان میں آٹےکا20 کلوکاتھیلا2600 روپے تک ہے۔سیالکوٹ2540 اوربہاولپور میں آٹےکا20 کلوتھیلا2506روپے تک میں فروخت ہو ر ہا ہے۔ لاڑکانہ 2500 اورگوجرانوالہ میں آٹےکا 20کلو کا تھیلا2467 روپے تک ہے۔ لاہورمیں آٹے کے 20 کلو تھیلےکی قیمت سب سے کم 1850 روپے تک ہے۔

یہ وہ صورتحال ہوتی ہے جس سے حکمران طبقہ مطمئن رہتا ہے کہ عوام اس روٹی اور گندم کے چکر میں ہی پھنسے رہیں گے اور اُن کو مزید کسی معاملے میں دلچسپی نہیں رہتی۔ روٹی ، پیٹ تمام معاملات میں اولین مقام اختیار کرلیتا ہے اور وہ ’کسی معاملے ‘ میں نہیں پڑنا چاہتے۔تاریخ شاہد ہے کہ برصغیر میں انگریزوں نے زرعی بازاروں کو عالمی منڈی کے ساتھ منسلک کرنے کے لیے غذائی نظام میں یکسانیت ٹھونسی گئی ۔جبری طور پر گندم کو غذامیں استعماری انداز سے داخل کرایا گیا ۔ ہزاروں بہترین مقامی روایتی غذاؤں کو نیچے دھکیل دیاگیا وہ اپنی جگہ انتہائی ہولناک حقیقت ہے ۔