شعورنیوز( انٹرنیشنل ڈیسک):برطانوی کالم نگار پیٹرونیلا وائٹ کا حال ہی میں لکھا گیا کالم ’فیمن ازم نے مجھے اور میری نسل کو ناکام کر دیا‘ سوشل میڈیا پر وائرل ہو رہاہے۔ اس کالم میں انہوں نے اپنی ذاتی زندگی کا موازنہ اپنی نسل کی دیگر کامیاب خواتین سے کیا، جن میں سے بہت سی اب تنہا اور بے اولاد ہیں۔ پیٹرونیلا نے دلیل دی کہ فیمن ازم کی لبرل فکر نے خواتین کو یہ سکھایا کہ وہ مردوں کی طرح سوچیں اور عمل کریں، جس کے نتیجے میں وہ اپنے خاندان اور بچوں کی قربانی دے کر کیریئر میں آگے بڑھ گئیں۔ انہوں نے اپنے اس احساسِ تنہائی کا ذکر کیا جو انہیں لگتا ہے کہ فیمن ازم کی باطل تعلیمات کا نتیجہ ہے۔

خواتین کو یہ فریب دیا گیا کہ اصل کامیابی صرف مادی خودمختاری اور نوکری میں ہے۔ اس کے نتیجے میں ایک ایسی نسل پروان چڑھی جو پچاس یا ساٹھ کی عمر میں مالی طور پر مستحکم تو ہے، لیکن وہ شدید تنہائی، بے اولادی اور جذباتی محرومی کا شکار ہو چکی ہے۔

پیٹرونیلا نے اپنی تحریر میں اس بات پر زور دیا کہ فیمن ازم نے خواتین کو ان کی فطری خواہشات سے دور کر دیا، جیسے کہ ماں بننا اور ایک مستحکم خاندان کا حصہ بننا۔ ان کے کالم کے بعد سوشل میڈیا پر ایک بحث شروع ہو گئی ہے جس میں کچھ خواتین نے ان کے موقف کی حمایت کی ہے جبکہ دیگر نے اسے فیمن ازم کی غلط تشریح قرار دیا ہے۔ کچھ خواتین کا کہنا ہے کہ فیمن ازم نے انہیں اپنے فیصلے کرنے کی آزادی دی ہے جبکہ دوسروں کا خیال ہے کہ ان نظریات نے اُنہیں ایک ایسے راستے پر ڈال دیا ہے جس کے نتیجے میں وہ اب مکمل تنہا ئی و لاچاری محسوس کر رہی ہیں۔

مستقل بدلتے ہوئے سماجی رویوں اور خاندانی اقدار کے مباحث مغرب میں سوشل میڈیا پر ڈسکس ہو رہے ہیں ۔ برطانوی اخبار کے لیے لکھا گیا معروف کالم نگار پیٹرونیلا وائٹ نے 2024 میں شائع کیا لیکن اب سال 2026ء میں سوشل میڈیا کے مختلف پلیٹ فارمز (ایکس، ٹک ٹاک اور انسٹاگرام) پر دوبارہ جنگل کی آگ کی طرح پھیلایا جا رہا ہے ۔

پیٹرونیلا وائٹ نے اپنے اس وائرل کالم میں لکھا تھا کہ جب وہ لندن کے ایک ریستوراں میں اپنی ہائیلی ایجوکیٹڈ اور کامیاب سہیلیوں سے ملتی ہیں، تو ان سب میں ایک چیز مشترک ہوتی ہے؛ وہ سب پچاس کی دہائی میں ہیں، اکیلی ہیں اور بے اولاد ہیں۔ ان کا کہنا تھا کہ ان کی نسل کو بچپن سے یہ سکھایا گیا کہ وہ مردوں کی طرح سوچیں، کیریئر کو اولین ترجیح دیں اور خاندانی زندگی یا شادی کو ثانوی حیثیت دیں۔ کالم کے مطابق، مالی خودمختاری انسان کو عارضی تسکین تو دے سکتی ہے مگر ایک طویل اور تنہا زندگی کے صدمات کو مٹا نہیں سکتی۔جدید فیمن ازم (خاص طور پر اس کی مغربی اور ریڈیکل اقسام) نے خاندانی اقدار، پردے، حیا اور مرد و عورت کے باوقار حدود کو فرسودہ قرار دے کر معاشرے کو انتشار کا شکار کر دیا ہے۔ اس سے طلاق کی شرح میں اضافہ ہوا اور خاندانی رشتوں کا تقدس پامال ہوا۔روایت پسندوں کے نزدیک روایتی خاندانی نظام میں مرد پر مالی کفالت (نفقہ) اور تحفظ کی جو قانونی و اخلاقی ذمے داری عائد ہوتی تھی، فیمن ازم نے اس بوجھ کو بھی خواتین پر ڈال دیا ہے۔ اس کے نتیجے میں عورت پر بیک وقت "گھر چلانے" اور "نوکری یا کیریئر سنبھالنے" کا دہرا دباؤ آ گیا ہے، جسے وہ عورت کی اصل آزادی نہیں بلکہ اس کا استحصال قرار دیتے ہیں۔

حمایتی مؤقف: بہت سی درمیانی عمر کی پیشہ ور خواتین اب کھل کر اس بات کا اعتراف کر رہی ہیں کہ معاشرے کی طرف سے "سب کچھ خود حاصل کرنے" (Have it all) کے دباؤ نے ان سے ان کا خاندانی سکون چھین لیا۔
شدید تنقید: دوسری طرف، حقوق نسواں کی تنظیموں اور سوشل میڈیا کے ایک بڑے طبقے کا کہنا ہے کہ فیمن ازم نے خواتین کو مجبور نہیں بلکہ "انتخاب کا حق" دیا تھا۔ اگر کسی نے اپنی مرضی سے کیریئر چنا تو یہ ان کا اپنا ذاتی فیصلہ تھا، جسے پورے نظریے کی ناکامی قرار دینا درست نہیں۔

ماہرینِ سماجیات کا کہنا ہے کہ یہ بحث اس بات کی غماز ہے کہ جدید دنیا میں کیریئر کی دوڑ اور جذباتی سکون یا خاندانی رشتوں کے درمیان توازن قائم کرنا آج کے دور کا سب سے بڑا انسانی اور معاشرتی چیلنج بن چکا ہے۔