شعور نیوز( ویب ڈیسک):بجلی کے صارفین کے لیے ایک بار پھر بل میں اضافے کا خطرہ پیدا ہو گیا ہے۔ تقسیم کار کمپنیوں نے نیپرا سے جولائی تا ستمبر 2026 کی تیسری سہ ماہی کے اخراجات کی ادائیگی کے لیے مجموعی طور پر 23 ارب 33 کروڑ روپے وصول کرنے کی درخواست کی ہے، جسے منظوری ملنے پر کراچی سمیت ملک بھر کے صارفین، بشمول کے الیکٹرک کے صارفین، متاثر ہو سکتے ہیں۔

یہ درخواست محض ایک ’سہ ماہی ایڈجسٹمنٹ‘ نہیں، بلکہ پاکستان کی بجلی کی پالیسی کی بنیادی کمزوری کا عکاس ہے: جہاں پیداوار کی گنجائش کی ادائیگی صارف سے کروائی جاتی ہے، خواہ بجلی استعمال ہو یا نہ ہو۔ کیپیسٹی چارجز کے تحت حکومت اور قومی ٹرانسمیشن اینڈ ڈسپچ کمپنی، منصوبوں کی دستیابی کی بنیاد پر ادائیگی کرتے ہیں؛ اس لیے کم طلب اور کم پیداوار کے باوجود بھی ادائیگیاں جاری رہتی ہیں۔

اس عمل کو ظالمانہ سرمایہ دارانہ نظام کی کریہہ شکل قرار دیاجاتا ہے جس میں سرمایہ دار کے سرمایہ کا نفع ہی اول آخر مقصود ہوتا ہے۔

درخواست میں سب سے بڑی رقم 38 ارب 92 کروڑ روپے کیپیسٹی چارجز کی ہے، جبکہ انتظامی و تقسیم کار مرمت وغیرہ کے 5 ارب 59 کروڑ 70 لاکھ روپے بھی شامل ہیں۔ انکریمنٹل پیکج کے تحت 29 ارب 25 کروڑ روپے کی کمی کے بعد خالص 23 ارب 33 کروڑ روپے کا اضافی بوجھ صارفین پر ڈالنے کی تجویز دی گئی ہے۔

نیپرا نے اس معاملے پر 17 نومبر کو سماعت رکھی ہے۔ اگر درخواست منظور ہوئی تو اخراجات تین ماہ، یعنی دسمبر 2026 سے فروری 2027 کے دوران، تقریباً 1.34 روپے فی یونٹ کے اضافے کی صورت میں وصول کیے جا سکتے ہیں۔

حکومت نے مہنگائی، معاشی دباؤ اور بھاری بجلی کے بلوں کے خلاف عوامی احتجاج کے بعد آئی پی پی معاہدوں کے ازسرِنو جائزے کی بات کی تھی، مگر صارفین کو بار بار نئی ادائیگیوں کا بل دینے کا سلسلہ رک نہیں رہا۔ 2024 میں حکومت نے 15 آئی پی پیز کے معاہدوں کے جائزے کا اعلان کیا تھا، جبکہ کچھ پرانے معاہدے بعد میں ختم بھی ہوئے؛ تاہم ساختِ نظام وہی ہے جو منافع اور ادائیگی کی ضمانت نجی منصوبوں کو دیتی ہے اور خطرے صارف پر منتقل کرتا ہے۔

آئی پی پی اسکینڈل کی جڑ ان معاہدوں میں ہے جن میں ڈالر میں منافع، بینک کے قرضوں کی ضمانت، مہنگی کرنسی کے خلاف تحفظ اور ‘ٹیک اور پے’ طرز کی ادائیگیاں شامل تھیں۔ نتیجہ یہ نکلا کہ ملک میں بجلی کی گنجائش ضرورت سے زیادہ ہونے کے باوجود صارفین کو غیر استعمال شدہ گنجائش کی ادائیگی کرنا پڑ رہی ہے۔