حکومتِ پاکستان نے ڈیٹا کی جنگ کا اعلان کردیا

اپنی ہر قسم کی معلومات کی اہمیت سے آگاہ کرنے کے لیے بڑے پیمانے پر مہم شروع کر دی

شعور نیوز ( ویب ڈیسک) : پاکستان کے عوام میں سوشل میڈیا جس طرح سرایت کرتا جا رہا ہے ویسے ویسے شدید سیکیورٹی خطرات بڑھتے جا رہے ہیں۔آسانی، تفریح، معلومات، سہولت، خریداری ، انٹرٹینمنٹ، سماجی اصلاح، دعوت دین وغیرہ جیسے خوشنما عنوانات کے نام پر سوشل میڈیا اب کمان سے نکلے ہوئے تیر کے مانند خطرناک ہوچکا ہے۔

حکومتِ پاکستان نے اس بات کو سمجھتے ہوئے ملک بھر میں ڈیٹا سیکیورٹی اور جدید دور کی ’’معلوماتی جنگ‘‘ سے متعلق عوامی آگاہی مہم کا آغاز کردیاہے۔ اس مہم کے تحت کروڑوں روپے کے اشتہارات، پوسٹرز اور ڈیجیٹل مواد کے ذریعے عوام کو بتایا جا رہا ہے کہ اب جنگیں ہتھیاروں سے نہیں بلکہ معلومات پر لڑی جا رہی ہیں۔

اشتہار میں واضح کیا گیا ہے کہ دشمن اب آمنے سامنے کسی میدانِ جنگ میں لڑنے کے بجائے انٹرنیٹ، سوشل میڈیا اور آن لائن رابطوں کے ذریعے نشانہ بنارہے ہیں ۔ملک کی حساس معلومات حاصل کی جاتی ہے ۔ مختلف مالی لالچ دے کر ، اداروں میں نوکریوں کے ذریعہ کام کرایا جاتا ہے۔ذہن سازی کے لیے مختلف اینجی اوز کی فنڈنگ سے ادارے بنوا کر ذہن سازی کی جاتی ہے ۔پھر انہیں ریاستِ پاکستان کے خلاف استعمال کرا جاتاہے۔

اب سوال یہ ہے کہ

یہ سارا ڈیٹا اتنا قیمتی کیوں ہوتا ہے؟

ڈیٹا جدید جنگ کا ہتھیار ہے — دشمن معلومات کے ذریعے سسٹمز ہیک، بیانیے کمزور یا رائے عامہ کو متاثر کر سکتا ہے۔

ڈیٹا ذہنی و نفسیاتی اثر ڈالنے کا ذریعہ ہے — عوام کی سوچ اور فیصلوں کو تبدیل کیا جا سکتا ہے۔

ڈیٹا اسٹریٹجک معلومات فراہم کرتا ہے — جیسے سرکاری منصوبے، حساس تنصیبات یا اداروں کی اندرونی ساخت۔

ڈیٹا کی مارکیٹ ویلیو بہت زیادہ ہے — بلیک مارکیٹ اور دشمن انٹیلی جنس ایجنسیاں معلومات خریدتی ہیں۔

یہ ایک نہیں کئی مثالیں ہیں۔ حالیہ دنوں اسرائیل کے ایران پر حملوں میں یہ اندرونی مخبری نظام نے بھی اسی بات کا الارم بجایا۔ اس کے بعد بھارت نے پاکستانی مساجد پر جس طرح کے ہدفی حملے کیے اُس میں بھی یہ بات صاف طور محسوس ہوئی۔یہ جو پاکستانی میڈیا پر فتنہ ہندوستان کہاجاتا ہے وہ بھی ایسے ہی نوجوانوں کو گھیرتے ہیں۔یہی نہیں آ پ کو یاد ہونا چاہیے کہ امریکہ جیسے ملک نے ٹک ٹاک پر پابندی کے لیے بھی یہی بات کہی کہ وہ اس کے ذریعہ امریکہ کی اہم معلومات لے رہا ہے۔ پہلے امریکہ نے ٹک ٹاک استعمال پر عمومی اس کے بعد سرکاری ملازمین پر پابندی لگائی تھی۔ مگر یہ سب بہت لیٹ ہو چکا ہے ، تیر کمان سے نکل چکا ہے ، اب امریکہ کے پاس ٹک ٹاک خریدنے کے سواکوئی آپشن نہیں۔

بہرحال حکومتی مہم کا مقصد عوام کو خبردار کرنا ہے کہ وہ شہرت، لائکس، پیسوں کے نام پر اپنی کوئی معلومات مت عام کریں۔کسی بھی مشکوک کال، پیغام یا شخص کے ذریعے حساس معلومات فراہم کرنے سے گریز کریں۔اور ایسی کسی بھی سرگرمی کو فوری طور پر متعلقہ اداروں کو رپورٹ کریں۔

پاکستان میں وی لاگ، فیملی وی لاگ اور اس کی تمام غلیظ اقسام نے جو تباہی پھیری ہے اس کے اثرات ایسے ختم نہیں ہونگے۔ حکومت کو سمجھ نہیں آرہی کہ دشمن کا سب سے بڑا ہتھیار اشاعت فحش ہے، وہ یہاں سے ہدف بناتا ہے، یہ ہے وہ کانٹا جسے لینا سب سے آسان ہوتا ہے۔ حکومت فحش مواد کے خلاف ایک قدم نہیں اٹھانے کو تیار ، مگر عوام کے کروڑوں روپے اس بات پر خرچ کر رہی ہے جس کا کوئی حاصل نہیں۔ یہ اشتہار جن کے لیے شائع ہوا ہے وہ نسل اخبارات پڑھتی ہی نہیں۔ اس وقت

نوجوان محنت سے رزق کمانے کے بجائے ، یوٹیوب ، فیس بک ،انسٹا سے پیسہ کمانے کی دھن میں لگ چکا ہے۔ یاد رہے کہ تصور رزق اور تصور پیسہ دو الگ تصورات ہیں۔اس کے نتائج بھی الگ ہیں۔