چرچ آف انگلینڈ میں ہم جنس پرستوں اور مغربی لبرل ازم کی نمائندہ خاتون نئی آرچ بشپ مقرر

شعور نیوز( انٹرنیشنل ڈیسک):چرچ آف انگلینڈ کی 1400 سالہ تاریخ میں پہلی مرتبہ ایک خاتون کو آرچ بشپ آف کینٹربری کے منصب پر فائز کر دیا گیا ہے۔63 سالہ سارہ مُللَلی (Sarah Mullally) نہ صرف چرچ کی نئی سربراہ بن چکی ہے بلکہ اب لبرل ایجنڈے کو چرچ کے مرکز تک پہنچانے والی تاریخی علامت بن کر سامنے آئی ہیں۔

لبرل ازم کا مذہبی مرکز میں داخلہ

سارہ مُللَلی کو دُنیا بھر میں ہم جنس پرست جوڑوں کے لیے چرچ کے اندر برکت کی دعائیں دینے والے کردار کے طور پر جانا جاتا ہے۔

اس نے اپنے ماتحت چرچ میں صنفی و جنسی آزادی کے ایجنڈے کو فروغ دیا ۔
روایتی خاندانی اقدار کو "دوبارہ نئی لبرل تعبیر" دینے میں وہ سب سے نمایاں ہیں۔

قدامت پسند عیسائی علما نے اس خاتون کی تقرری کو چرچ کے اندرونی نظریاتی ٹکراؤ کا نیا باب قرار دیا ہے۔

روایات سے انحراف، لبرل راستے کی طرف قدم

چرچ آف انگلینڈ صدیوں سے عیسائیت کے مرکز کی علامت رہا ہے، مگر اب وہ مغربی معاشروں کے لبرل دباؤ کے سامنے مستقل جھکنے لگا ہے۔

چرچ میں خواتین بشپ کی تقرری،
جنسی رویّوں میں نرمی،
اور مذہبی تعلیمات کو جدید معاشرتی تصورات کے تابع کرنا
یہ سب وہ تبدیلیاں ہیں جو اُن کے مذہبی ڈھانچے کو تبدیل کرنے لگی ہیں۔سارہ مُللَلی کی تقرری اسی عمل کا تسلسل ہے۔ تجزیہ کاروں کے مطابق، اب چرچ کا نظریاتی مرکز شمالی امریکہ و برطانیہ کے لبرل شہروں کی طرف منتقل ہوتا جا رہا ہے، جبکہ افریقہ و ایشیا کے قدامت پسند عیسائی طبقے خود کو کنارے پر محسوس کر رہے ہیں۔

قدامت پسند عیسائیوں کا شدید ردعمل

افریقی و ایشیائی چرچ اتحاد نے اس تقرری کو چرچ کی "قیادت سے دستبرداری" قرار دیا۔اُن کا کہنا ہے کہ یہ تقرری لبرل رجحانات کو مزید مضبوط کرے گی اور عیسائی برادری میں تقسیم بڑھے گی۔

تاریخ گواہ ہے کہ جب کوئی اپنے پاس دستیاب الہامی اصولوں ، الہامی تعلیمات سے دور ہوگا،تو وہ نظریاتی انتشار کا شکار ہوگا۔ لبرل ازم کی چمک وقتی ہے جس کا انجام خاندانی نظام کی بربادی، روحانی خلا، اور معاشرتی افراتفری ہے۔

خبر برطانیہ کی ہے مگر اس میں پیغام ہر اُس شخص کے لیے ہے جو کسی خدا کو اپنا حاکم ، اپنا رب ، اپنا مالک ، تسلیم کرتا ہے ۔