شعور نیوز( ویب ڈیسک):سندھ حکومت کے بحالی پلان نے کراچی کے معروف شاپنگ سینٹر گل پلازہ میں ہونے والی آتش زدگی سے متعلق تمام سازشوں کا پردہ چاک کر دیا۔سندھ حکومت کے ابتدائی پلان کے مطابق متاثرہ دکانداروں کو عارضی طور پر کاروبار کے لیے جگہ فراہم کرنے اور نقصانات کا تخمینہ لگانے سمیت ازسرنو تعمیر کے مختلف آپشنز پر کام کیا جا رہا ہے۔ وزیراعلیٰ سندھ مراد علی شاہ نے گل پلازہ کے ہر دکان دار کو 5،5 لاکھ روپے امداد اور ایک کروڑ روپے بطور قرض بھی دینے کا اعلان کیا ہے ۔ وزیر اعلیٰ نے سندھ اسمبلی میں بحالی منصوبہ بتاتے ہوئے اس عمارت کو گرا کر دکانوں کی دوبارہ تعمیر کا اعلان کیا ہے۔سندھ حکومت اس سے قبل گل پلازہ سانحے میں شہید ہونے والوں کے لواحقین کو فی کس ایک کروڑ روپے دینے کا اعلان بھی کرچکی ہے۔

سندھ اسمبلی میں خطاب کرتے ہوئے وزیراعلیٰ سندھ مراد علی شاہ نے کہا کہ سانحہ گل پلازہ کے متاثرین کے لواحقین کے ساتھ کھڑے ہیں، اس افسوسناک واقعے میں غفلت اور کوتاہیاں ہوئی ہیں اور سانحے کا ذمے دار کوئی بھی ہو، وہ سزا سے نہیں بچ سکے گا۔

وزیراعلیٰ سندھ نے بتایا کہ اس واقعے میں 82 افراد کی مسنگ رپورٹ درج ہوئی تھی، جن میں سے اب تک 61 لاشیں ریکور کی جاچکی ہیں جب کہ 15 افراد تاحال لاپتہ ہیں۔ وزیراعلیٰ کے مطابق 52 افراد کا ڈی این اے پراسس جاری ہے۔

مراد علی شاہ نے کہا کہ 10 بج کر 14 منٹ پر گل پلازہ کے گراؤنڈ فلور پر آگ لگی جب کہ 10 بج کر 26 منٹ پر آگ لگنے کی اطلاع موصول ہوئی، ساڑھے 10 بجے کمشنر کراچی موقع پر پہنچ چکے تھے۔

مراد علی شاہ نے بتایا کہ گل پلازہ کی لیز 1991 میں اس وقت کے میئر نے منظور کی تھی،اور 2003 میں اس وقت کے میئر نے دکانوں میں اضافے کی منظوری دی جب کہ 2001 میں عمارتوں کو ریگولرائز کرنے کا آرڈیننس آیا تھا۔

انہوں نے کہا کہ سانحے میں غفلت اور کوتاہیاں ہوئیں ہیں ہمارے پاس وسائل کی کمی ہے ، سانحے کو سیاست کے لیے استعمال کرنا جرم کے مترادف ہے۔وزیراعلیٰ سندھ نے واضح کیا کہ اگر حکومتی اداروں یا ان کی اپنی غفلت ثابت ہوئی تو سزا دی جائے گی۔

حکومتی حکام کا کہنا ہے کہ دکانوں میں موجود اسٹاک کی مالیت کا باقاعدہ تخمینہ لگایا جائے گا، جس کے بعد نقصانات کا ریکارڈ مرتب کیا جائے گا۔ اس کے ساتھ ساتھ گل پلازہ کی ازسرنو تعمیر کے حوالے سے مختلف آپشنز پر بھی کام جاری ہے۔ذرائع کے مطابق سندھ حکومت نے متاثرین کے عارضی کاروبار کے لیے تین مقامات کو حتمی شکل دے دی ہے، جہاں گل پلازہ کی دوبارہ تعمیر مکمل ہونے تک دکانداروں کو کاروبار کی سہولت فراہم کی جائے گی۔