شعور نیوز( انٹرنیشنل ڈیسک):بالفور اعلامیہ در اصل ایک خط تھا جو 2 نومبر 1917 کو برطانوی وزیرِ خارجہ آرتھر بالفور نے جاری کیا تھا۔ اس خط میں فلسطین کی سرزمین پر یہودیوں کے لیے ’قومی وطن‘ کی حمایت کرکے اس کے قیام کے لیے ایک گرین سگنل دے دیا گیا تھا۔ اس خط میں ایک اور ثبوت بھی ملتا ہے کہ وہ خطہ کبھی یہودیوں کا تھا ہی نہیں بلکہ ایک بیرونی طاقت کی کیبنٹ نے ہمدرد ی کی بنیاد پر باقاعدہ ایک صیہونی فیڈریشن کے نام سے منظور کیا تھا۔

پاکستان کا شمار دنیا میں مذہب کی بنیاد پر بننے والی نظریاتی نیشن اسٹیٹ کا ہے۔ برصغیر ہندوستان میں 23 مارچ 1940 کو کروڑوں مسلمانوں کے لیے ایک الگ وطن کو بطور حل کے طور پر منظور کیاگیا تھا۔مگر اس میں اہم بات یہ ہے کہ ہندوستان میں مسلمان نہ صرف ڈیڑھ ہزار سال سے رہ رہے تھے بلکہ 1000 سال سے حکمران بھی تھے ، اور اس حل کو مسلمانوں کی قیادت نے متفقہ طور پر منظور کیا تھا اور یہ سارا عمل کسی کی زمین پر قبضے کے بجائے سادہ ڈیموکریسی کےعمل پرکھڑا ہوا تھا۔

فلسطین کی سرزمین پر برطانیہ کا قبضہ ناجائز تھا اور برطانیہ میں بیٹھ کر کوئی ایسے خط لکھ کر اپنے برطانیہ سے نکالے گئے یہودیوں کو فلسطین میں نیا ملک نہیں بانٹ سکتا تھا۔دنیا بھر سے بدمعاش، غنڈے، جرائم پیشہ، بدکردار ، غلیظ صیہونیوں کو نکال کر یہاں قبضے کرنے بھیجا گیا تھا تاکہ وہ یورپی ممالک ان بدمعاشوں سے محفوظ ہو سکیں ۔ اس کام کے لیے اُس وقت کی سپر پاور برطانیہ کی پوری معاشی، عسکری ،سیاسی سرپرستی اُن صیہونیوں کو دی گئی تھی۔فلسطین میں زمینیں خرید کر غیر مسلموں کا آباد ہونا جوہری طور پر کوئی مسئلہ نہیں تھا کیونکہ مسلمان تو غیر مسلموں کے درمیان خلافت کے طویل دور میں رہنا جانتے تھے ۔اصل مسئلہ اُسی زمین پر الگ شناخت کے ساتھ اور بیت المقدس پر قبضے کے ناپاک عزائم اور صیہونی ریاستی شناخت نے جنم دیا۔

فلسطینی صدر محمود عباس کے حکم کے تحت ہر سال 2 نومبر کو فلسطینی پرچم سرنگوں کیا جاتا ہے۔آج بالفور اعلامیے کے 109 سال بعد قبلہ اول کے شہزادوں کی فلسطینی تحریک نے اپنے بیان میں برطانیہ اور قابض اسرائیل پر شدید تنقید کرکے دنیا کو حقیقت یاد دلائی ہے۔ تحریک کا عزم ہے کہ فلسطینی عوام اپنی سرزمین، حقوق اور مقدس مقامات پر ثابت قدم ہیں اور آزادی اور واپسی کی جدوجہد جاری رکھیں گے۔

بالفور کے اس سفاک خط کو ’جدید تاریخ کی سب سے بڑی ناانصافیوں میں سے ایک‘ قرار دیا گیا۔ برطانوی حکومت نے ایسی سرزمین ان لوگوں کو دینے کا اعلان کیا جو’نہ اس کی ملکیت تھی اور نہ ان کا اس پر کوئی حق تھا‘۔پوری دنیا دیکھ رہی ہے کہ نوآبادیاتی ذہنیت آج بھی قابض اسرائیلی پالیسیوں کو چلا رہی ہے۔ غزہ میں 3 سال سے قتل، ناکہ بندی، بھوک اور بے دخلی جاری ہے، جبکہ مغربی کنارے کے شہروں، قصبوں اور پناہ گزین کیمپوں میں بھی یہی کچھ ہو رہا ہے۔

تحریک نے دعویٰ کیا ہےکہ غزہ، مغربی کنارے اور مقبوضہ مشرقی یروشلم میں اسرائیلی جارحیت بڑھ گئی ہے۔ انکے بیان میں کہا گیا کہ "عالمی کارروائی کی غیر موجودگی میں" غزہ کے لوگ بگڑتے انسانی بحران اور "جاری نسل کشی" کا سامنا کر رہے ہیں۔ مغربی کنارے اور یروشلم میں بے دخلی اور بستیوں کی توسیع بین الاقوامی قانون کی خلاف ورزی میں بڑھ رہی ہے۔

مزاحمت کاروں نے کہا کہ اسرائیلی قبضے کے جرائم اور نوآبادیاتی منصوبے فلسطینیوں کی قومی شناخت مٹا نہیں سکیں گے اور نہ ان کے تاریخی حقوق کو ختم کر سکیں گے۔ بیان میں ان جرائم کو "قبضے اور اس کے حامیوں کی دہشت گردی کا ثبوت" کہا گیا۔تحریک نے عالمی برادری سے مطالبہ کیا کہ اسرائیلی حکومت پر دباؤ ڈال کر جرائم رکوائے جائیں، اس کے رہنماؤں کے خلاف بین الاقوامی عدالتوں میں جنگی مجرموں کے طور پر مقدمات چلائے جائیں اور فلسطینیوں کو ان کے حقوق دلائے جائیں۔

قابض اسرائیل اور اس کے حامی بالفور اعلامیے کو یہودیوں (صیہونیوں) کے تاریخی حق کی بین الاقوامی پہچان سمجھتے ہیں۔ وہ کہتے ہیں کہ اس اعلامیے میں غیر یہودی آبادی کے حقوق کے تحفظ کی شرط بھی شامل تھی۔