شعور نیوز( ویب ڈیسک):روسی صدر ولادیمیر پوٹن کی بیٹی اور نا م نہاد طبی محقق، ماریا ورونٹسووا کی جانب سے میڈیا پر دعویٰ کیا گیا ہے کہ اگلے 10 سے 20 سالوں میں بڑھاپا روکنے اور عمر بڑھانے والی (Anti-Aging) ادویات تیار کر لی جائیں گی۔اہم بات یہ ہے کہ یہ گولیاں پیناڈول ،ڈسپرین کیطرح نہیں بلکہ امیر کبیر سرمایہ داروں کے لیے ہی ہونگی کیونکہ فارما کی دستیاب تاریخ یہی بتاتی ہے کہ اتنا کھربوں ڈالر کا سرمایہ لگانے کے بعد اس کے مقاصد بھی عین سرمایہ دارانہ ہی ہوں گے ۔ بظاہر سائنسی ترقی کا کارنامہ نظر آنے والا یہ دعویٰ دراصل خُدائی وجود اور احکامات سے انکار کے بعد انسان کی قدرت کے نظام کو اپنے قابو میں کرنے کی ایک اور خطرناک کوشش کا عکاس ہے جو کئی سالوں سے مختلف عنوانات کے تحت جاری ہے۔

ماسکو میں منعقدہ ”لِیو لونگ، لِیو ڈفرنٹلی“ عنوان سے منعقدہ ایک ایونٹ کے دوران ماسکو اسٹیٹ یونیورسٹی کے میڈیکل ریسرچ اینڈ ایجوکیشن انسٹی ٹیوٹ کی سربراہ ماریہ فورونتسووا نے کہا کہ انسان میں موت کا بڑھتا ہوا خوف آئندہ 10 سے 20 سال کے اندر صحت کی دیکھ بھال کے شعبے کو اس نوعیت کے سائنسی حل تلاش کرنے پر مجبور کر دے گا۔

ماریہ فورونتسووا نے طویل عمری کے حصول کو دو مراحل میں تقسیم کرتے ہوئے وضاحت کی کہ متوازن غذا، باقاعدگی سے ورزش اور الکحل کے محدود استعمال جیسے صحت مند معمولات زندگی انسان کو 80 سال سے زائد عمر تک زندہ رکھنے میں مدد دے سکتے ہیں، تاہم اس حد سے آگے بڑھنے کے لیے ایسی طبی پیش رفت کی ضرورت ہوگی جو انسانی زندگی کی حیاتیاتی حدود کو چیلنج کر سکے۔

طویل عمری میں یہ دلچسپی صرف طبی تحقیقات تک محدود نہیں بلکہ سنہ 2000 سے روس پر حکمرانی کرنے والے صدر ولادیمیر پیوٹن بھی بائیو ٹیکنالوجی اور اعضاء کی تبدیلی کے ذریعے فعال زندگی کو بڑھانے پر اعلانیہ بات کرتے رہے ہیں۔

گزشتہ سال بیجنگ میں چینی صدر شی جن پنگ کے ساتھ ایک ملاقات کے دوران دونوں رہنماؤں کو بڑھاپے اور انسان کے 150 سال تک زندہ رہنے کے امکانات پر تبادلہ خیال کرتے ہوئے سنا گیا تھا، جس کے بعد پیوٹن نے صحافیوں کو بتایا تھا کہ جدید طب اور اعضاء کی پیوند کاری کی سرجری سے انسانوں کے طویل عرصے تک متحرک رہنے کی امید پیدا ہوئی ہے۔

روسی حکومت نے سنہ 2024 میں صحت کی دیکھ بھال کی بہتری اور اوسط عمر میں اضافے کے لیے 26 ارب ڈالر کے قومی منصوبے ”نیو ٹیکنالوجیز فار ہیلتھ پریزرویشن“ کا بھی اعلان کیا تھا، جس کے تحت روس میں genetics اور خلیاتی سطح پر بڑھاپے کے عمل کو سست کرنے والے علاج پر تحقیق کے لیے فنڈز فراہم کیے جا رہے ہیں۔

اس ساری سائنسی پیش رفت کے پیچھے چھپے فلسفے اور پوشیدہ عزائم کا گہرائی سے جائزہ لیا جائے تو چند اہم حقائق سامنے آتے ہیں:

شفا کے بجائے لافانی ہونے کی خواہش: جدید طبی سائنس کا اصل مقصد بیماریوں کا علاج اور انسانی تکلیف کو کم کرنا ہونا چاہیے، لیکن یہ نئی تحقیق کسی بیماری سے شفا پانے کے لیے نہیں بلکہ موت کے عالمگیر قانون کو چیلنج کرنے کے لیے ہے۔ انسان اب صرف صحت مند زندگی نہیں چاہتا، بلکہ وہ "لافانی" (Immortal) ہونے کے خواب دیکھ رہا ہے۔

بڑھاپا روکنے یا عمر لمبی کرنے کا یہ دعویٰ سائنسی ترقی کا ایک بہت بڑا دھوکہ ہے۔ انسانی تاریخ گواہ ہے کہ جب بھی انسان نے ٹیکنالوجی کے بل بوتے پر قدرت کو نیچا دکھانے کی کوشش کی، فطرت نے اس سے بھی بڑی تباہی کی صورت میں جواب دیا۔ عمر بڑھانے کا یہ فریب انسان کو ذہنی سکون دینے کے بجائے ابدی زندگی کی لامتناہی اور لاحاصل دوڑ میں مبتلا کر دے گا۔

خدائی دائرے میں داخلے کی کوشش: ماریا ورونٹسووا نے خود اعتراف کیا کہ اس ریسرچ کے پیچھے انسان کا "موت کا وجودی خوف" کام کر رہا ہے۔ یہ خوف دراصل انسان کو اپنی کمزوری تسلیم کرنے سے روکتا ہے اور اسے قدرت کے طے کردہ دائروں کو توڑ کر خود خدائی کے دائرے میں داخل ہونے پر اکساتا ہے، جہاں وہ زندگی اور موت کا فیصلہ اپنے ہاتھ میں لینا چاہتا ہے۔

زندگی، بڑھاپا اور موت کائنات کا سب سے متوازن اور اٹل نظام ہے۔ اس نظام کو بدلنے کی کوئی بھی کوشش زمین پر وسائل کے بحران، شدید سماجی ناہمواری اور فطری توازن کی مکمل تباہی کا سبب بنے گی۔ انسان کا یہ زعم کہ وہ موت کو شکست دے سکتا ہے، دراصل قدرت کے سامنے اس کی نادانی اور سرکشی کی انتہا ہے۔

سائنسدانوں اور مفکرین کا ماننا ہے کہ الہیٰ اور فطری قوانین سے ٹکرانے کا انجام کبھی بھی انسانیت کے حق میں اچھا نہیں رہا۔ سائنسی ترقی اگر انسان کو عاجزی سکھانے کے بجائے اس میں خود کو خدا سمجھنے کا تکبر پیدا کر دے، تو وہ ترقی نہیں بلکہ خودکشی کا راستہ بن جاتی ہے۔