شعور نیوز( ویب ڈیسک):اسلام آباد میں ڈان گروپ نے عالمی استعماری ایجنڈے پر مسلمانوں کی آبادی کم کرنے کی منصوبہ بندی کی 2 روزہ کانفرنس مکمل کرلی۔کانفرنس میں دو دن تک 12 سیشن ہوئے جن میں ایک کے علاوہ تمام سیشن میں لبرل، سیکولر افراد نے استعماری ایجنڈے کو بڑھاوا دیا۔

دوسرے دن کانفرنس میں 4مخصوص ریاستی علما کو بھی ایک سیشن میں 10 -10 منٹ گفتگو کی دعوت دی گئی ، جس کی صدارت ایک غیر عالم وفاقی وزیر سے کرائی گئی ۔علمائے کرام نے روایتی مذہبی بیانیے سے ہٹ کرکانفرنس میں آبادی کے ’توازن‘ کو’اعتدال‘ نئے معانی پہنا کر مزید کنفیوژڈ بیانیہ پیش کرکے اپنی جان بچائی۔

مجموعی طور پرچاروں علمائے کرام نے جان بچانے کی صورت میں اسقاطِ حمل کی اجازت پر اتفاق ظاہر کیا۔صرف ایک مفتی زبیر اشرف عثمانی نے قرآنی حکم کے مطابق رزق کے نام پر اولاد کے قتل کے خلاف بھرپور دلائل دیئے جنہیں بعد کے سیشن میں لبرل فیمنسٹ مقررین نے رد کرکے عالمی استعماری ایجنڈے کو مضبوط کیا۔اس کمزوری کی وجہ یہ رہی کہ تمام معزز علمائے کرام میں سے کسی نے بھی استعمار ی تناظر اور سرمایہ دارانہ تباہی کو موضوع نہیں بنایا۔

جتنے مذہبی نمائندے آئے کسی نے یہ سوال اٹھانے کی جرأت نہیں کی کہ جب آپریشن کے نتیجے میں عورت پر صرف چار بچوں کی قد غن لگتی ہے اُس کا ذمہ دار کون ہے؟
عورت کی جان کو خطرات جدید طریقہ آپریشن کی وجہ سے کہیں زیادہ ہو چکے ہیں اُس کا ذمہ دا ر کون ہے؟
بچہ کی پیدائش ہزارہا سال سے معاشرتی عمل تھا ، اسے طبی عمل بنانے سے جو بحران پیدا ہوئے ہیں اُس پر کب بات ہوگی؟
مذہبی رہنماؤں کی طرف سے سختی کے ساتھ یہ وضاحت بالکل نہیں کی گئی کہ ملک کے لاکھوں لکھ پتی، مالدار تاجروں ، بیوروکریٹ وغیرہ کے نزدیک مالی وسائل کا اگر بالکل مسئلہ نہیں ہے تواُن کو نبیﷺ کی امت میں ہر 2 سال بعد اضافہ کرتے رہنا چاہیے ۔
ماں کی صحت کے نام پر جو مسائل پاکستان میں ہیں ، اُن کے لیے مختص وسائل کون کھا رہا ہے؟
کسی نے بھی یہ سوال اٹھانے کی کوشش نہیں کی کہ اگر ماں (عورت) کی زندگی کو ،صحت کوکسی قسم کا بحران ہے تو آج بھی پاکستان میں خواتین کی تعداد مردوں سے زیادہ کیسے ہے؟

اس طرح کے اہم تضادات پر بات نہ کرنے سے استعماری سرگرمی پر مزید مہر لگی۔

وزیرِ اطلاعات کی گفتگو — مسئلے کی ذمہ داری کون لے گا؟

علمائے کرام کے اس سیشن کی صدارت ایک غیر عالم اور دین بےزار وفاقی وزیر اطلاعات عطااللہ تارڑ سے کرائی گئی۔ انہوں نے کہا کہ پاکستان آبادی کے ’’سانحے‘‘ کی طرف بڑھ رہا ہے، اور خواتین کی صحت سے متعلق مسائل کو ایک مردانہ سوچ کے باعث نظرانداز کیا جاتا ہے۔انہوں نے مذہبی طبقات سمیت تمام فریقوں سے گزارش کی کہ ایک جامع چارٹر تیار کیا جائے جسے پارلیمنٹ میں پیش کیا جاسکے۔ ان کے مطابق آبادی، معاشی ترقی اور خواتین کا سماجی کردار براہِ راست ایک دوسرے سے وابستہ ہیں۔

وفاقی وزیر کی گفتگو میں تضاد

اس پورے بیانیے میں وفاقی وزیر خود اپنے لبرل منہج فکر میں یہ نہیں سمجھا سکے کہ مسلمان کا پیدا ہونا سانحہ کیسے ہو سکتا ہے؟ کیا نئے پیدا ہونے والے بچے کو’معاشی ترقی ‘ ترقی کا حق نہیں جو اُس کو دنیا میں آنے سے قبل قتل کر دیا جائے۔یہ خود کتنی خوفناک خود غرضی ہے کہ مغرب کی پیش کردہ ’معاشی ترقی‘ سب کو نہیں مل سکتی ۔اس جیسے کئی تضادات کانفرنس میں چھوڑے گئے۔

اسلامی نظریاتی کونسل — تائید بھی، احتیاط بھی

اسلامی نظریاتی کونسل کے قائم مقام چیئرمین ڈاکٹر راغب نعیمی نے آبادی میں توازن کے نام پر گفتگو کرتے ہوئے کہاکہ اسلام میں وقفۂ حمل صرف ماں کی جان بچانے کے لیے عارضی ضرورت کے تحت جائز قرار دیا جاتا ہے۔ اس میں غیر شرعی طریقہ کار کی کوئی گنجائش نہیں ۔ ماں اور بچے ، خاندانی خوشحالی، فلاح معاشر ہ کے لیے باوقار انداز میں وقفہ ولادت وتولیدی صحت سے متعلق شعور اجاگر کرنے کی مہم چلانا اہم ضرورت ہے ۔ اسلام نے قدرتی طور پر ہر بچے کی ولادت میں صرف 2 سال کا وقفہ رکھنے کی جانب اشارہ دیا ہے اس کی وجہ بھی یہ رکھی گئی ہے کہ بچہ ماں کا دودھ پی کر اچھی صحت سے پرور ش پا سکے۔ راغب نعیمی نے صحت کی تباہی کی وجوہات ، علاج کی عدم سہولیات ، غذاکس نے چھینی ؟ کیوں خواتین کو اچھی غذا نہیں مل رہی ؟ ان پر کوئی سوال ہی نہیں اٹھایا۔

علامہ راغب نعیمی نے تجاویز دیتے ہوئے کہاکہ

اس کی ابلاغی مہم قومی سطح سے لیکر یوسی سطح تک ہونا چاہیے۔
حکومتی پالیسی میں تسلسل اور نماز جمعہ میں اس پر بات کی جائے۔
اسکول کالج میں جید علما ئے کرام کی جانب سے لیکچرز۔
خواتین کی تربیت ۔
نئے چھوٹے شہر بسائے جانے چاہیے۔

روایتی موقف میں تبدیلی — مگر کتنی؟

رویتِ ہلال کمیٹی کے چیئرمین مولانا عبد الخبیر آزاد نے اعتراف کیا کہ ماضی میں علما خاندانی منصوبہ بندی کی شدید مخالفت کرتے رہے ہیں، لیکن اب مذہبی طبقے کا عمومی فہم تبدیل ہو رہا ہے۔

دوسری جانب ڈاکٹر قبلہ ایاز نے نشاندہی کی کہ 1960 کی دہائی سے اب تک بڑے علما نے کبھی بھی آبادی کم کرنے کی پالیسیوں کی حمایت نہیں کی۔ ان کے مطابق آبادی کو خوراک کے بحران سے جوڑنا ’’غلط‘‘ ہے، مگر ماؤں اور بچوں کی صحت پر منفی اثرات کو نظرانداز بھی نہیں کیا جا سکتا۔انہوں نے کہا کہ ماں بچے کی صحت اور وقفہ جیسی اصطلاح کو علما نے پھر بھی قبول کیا اور بعد ازاں توازن کی اصطلاح کو بھی علمائے کرام نے قبول کیا کہ ماں بچے کی صحت و زندگی کے ساتھ منسلک کیا جائے گا تو یہ بیانیہ اس حد تک قبول کیا جا سکتا ہے۔

’’آبادی مسئلہ نہیں‘‘ — دوسرا بے باک مؤقف

جامعہ دارالعلوم کراچی کے نائب مہتمم مفتی زبیر اشرف عثمانی نے واضح رائے دی کہ آبادی میں اضافہ نہ تو مسئلہ ہے اور نہ ہی یہ غذائی بحران کا سبب بنتا ہے؛ ہر پیدا ہونے والا بچہ ’’رزق ساتھ لے کر آتا ہے‘‘۔ انہوں نے صرف انسانی جان یعنی ماں کی زندگی کے خطرے کی صورت میں اسقاط حمل کی گنجائش نکالی۔

خواتین کی سلامتی اور فیصلہ سازی — شرعی نکتہ نظر

سیشن میں خصوصی طور پر بلائی گئی لبرل ایڈووکیٹ حمیرہ مسیح الدین نے علمائے کرام کے سامنے قرآن و حدیث کی من پسند تشریح کرکے واضح کیا کہ عورت کو اپنی صحت، حمل اور اولاد کے فیصلوں میں مکمل شرعی حق حاصل ہے، لیکن پاکستانی معاشرے میں اسے عملی طور پر یہ حق نہیں دیا جاتا۔وکیل نے سورہ توبہ کی آیت کی من پسند تشریح کرکے نہایت عیاری و مکاری سے میاں بیوی کے رشتے کو عورت مرد کا عنوان دے کر برابری کا لیبل لگایا۔ستم دیکھیں کہ اگلے ہی جملے میں بچے کی حوالگی کا ایک واقعہ پیش کرکے ماں کے مقام کو برابری سے ہٹا کر آگے بڑھا دیا۔

انہوں نے کہا کہ مسلسل حمل اور غذائی قلت خواتین کو موت کے دہانے تک لے جاتی ہے، اور ایسی صورتحال میں عورت کی رائے شامل نہ کرنا ’’ناقابلِ تصور‘‘ ہے۔ انہوں نے الازہر کے فتوے کا حوالہ بھی دیا جس کے مطابق قرآن میں مانع حمل طریقوں کی کوئی ممانعت نہیں۔

تضاد: علمائے کرام اپنی تقریر میں صحت و زندگی کے نام پر بیانیے کو قبول کیا ،مگر خاتون وکیل نے عورت کو isolateکرتے ہوئے صحت، حمل، اولاد کے فیصلوں میں اکیلا مالک قرار دے دیا۔ ہر وہ عورت جو ماں بن رہی ہوتی ہےوہ کسی کی بیوی، بیٹی، بہو، بہن بھی ہوتی ہے ،اُس کی صحت صرف اُس کی اپنی نہیں ہوتی پورا گھر ،خاندان اُس سے وابستہ ہوتا ہے۔

اجلاس کا نتیجہ — اتفاق بھی، اختلاف بھی

تمام مقررین اس بات پر متفق نظر آئے کہ ماں اور بچے کی صحت اور زندگی اہم ترجیح ہے ، لیکن خاندانی منصوبہ بندی کی مذہبی حیثیت پر اختلافات بدستور موجود ہیں۔